Student Union Election Results: विद्यार्थी संघ निवडणुकीत पुन्हा भगवा फडकला; काँग्रेसचा पराभव, ABVP चे 3 प्रमुख पदांवर वर्चस्व

DUSU Election Results: देशाची राजधानी असलेल्या दिल्ली विद्यापीठाच्या (DUSU) अत्यंत प्रतिष्ठेच्या विद्यार्थी संघ निवडणुकीचा निकाल अखेर जाहीर झाला आहे. यंदाच्या रणधुमाळीत भारतीय जनता पक्षप्रणित अखिल भारतीय विद्यार्थी परिषदेने (ABVP) पुन्हा एकदा आपले वर्चस्व सिद्ध करत चारपैकी प्रमुख तीन पदांवर दणदणीत विजय संपादन केला. या निवडणुकीत सर्वात महत्त्वाच्या मानल्या जाणाऱ्या अध्यक्षपदाच्या शर्यतीत एबीव्हीपीचे उमेदवार यश डबास यांनी 24,576 मते मिळवून विजयी पताका फडकवली. त्यांनी काँग्रेसप्रणित नॅशनल स्टुडंट्स युनियन ऑफ इंडिया (NSUI) चे उमेदवार विजय शंकर मीणा यांचा पराभव केला. संपूर्ण मतमोजणीदरम्यान दोघांमध्ये जोरदार चुरस पाहायला मिळाली, मात्र अंतिम फेरीत डबास यांनी आघाडी कायम ठेवत बाजी मारली. या निवडणुकीतील सर्वात मोठा धक्का उपाध्यक्षपदाच्या निकालात बसला, जिथे अपक्ष उमेदवार दीपांशु शौकीन यांनी तब्बल 30,634 मते मिळवून विरोधकांना चारी मुंड्या चित केले.

हेही वाचा – Rojgar Mela 2026: देशातील 51 हजारांहून अधिक तरुणांना मोठं गिफ्ट; पंतप्रधान मोदींच्या हस्ते शासकीय नियुक्तीपत्रांचे वाटप

विद्यार्थी सुरक्षा अन् पीजी हॉस्टेलचे सेफ्टी ऑडिट 

ऐतिहासिक विजयानंतर बोलताना नवनिर्वाचित अध्यक्ष यश डबास यांनी संपूर्ण विद्यार्थी वर्गाचे आणि कार्यकर्त्यांचे आभार मानले. हा विजय म्हणजेच राष्ट्रवाद आणि विद्यार्थ्यांच्या एकजुटीचे प्रतीक असल्याचे त्यांनी नमूद केले. आपल्या आगामी कार्यकाळातील ध्येयधोरणांबाबत स्पष्ट करताना डबास यांनी कॅम्पसमधील विद्यार्थ्यांची सुरक्षा हाच सर्वात प्राथमिक आणि महत्त्वाचा विषय असल्याचे सांगितले. सत्य निकेतन परिसरातील अलीकडील दुर्दैवी दुर्घटनेचा पुनरुच्चार करत त्यांनी सांगितले की, भविष्यात अशा घटना टाळण्यासाठी प्रत्येक महाविद्यालय, हॉस्टेल आणि पेइंग गेस्ट (PG) सुविधांचे तातडीने सुरक्षा ऑडिट केले जाईल.

#WATCH | Delhi University Students' Union (DUSU) election results: ABVP's Yash Dabas wins the post of President with 24,576 votes. He says, "It is a victory of harmony, patriotism, and the collective strength of the Sangh. Students from institutions ranging from PU to DU have… https://t.co/gzZODTeyOr pic.twitter.com/2VK64Zr2MX — ANI (@ANI) September 19, 2026

निकालानंतर डीयू परिसरात ढोल-ताशांच्या गजरात जल्लोष

अध्यक्षपदासह सचिव आणि संयुक्त सचिव या दोन्ही पदांवरही एबीव्हीपीच्या अधिकृत उमेदवारांनी दणदणीत यश मिळवत विजयावर शिक्कामोर्तब केले. सचिवपदी एबीव्हीपीच्या छाबडी यांनी बाजी मारली. गेल्या वर्षीप्रमाणेच यंदाही विद्यार्थी परिषदेने 3-1 अशा फरकाने आपली पकड मजबूत ठेवली आहे. निवडणुकीचे निकाल अधिकृतपणे जाहीर होताच दिल्ली विद्यापीठाच्या कॅम्पसमध्ये विजयी कार्यकर्त्यांनी प्रचंड जल्लोष केला. भगवा गुलाल उधळत, ढोल-ताशांच्या तालावर नाचत आणि घोषणाबाजी करत विद्यार्थ्यांनी संपूर्ण परिसर दुमदुमून टाकला.