Mumbai Central-Ahmedabad Vande Bharat: मुंबई आणि अहमदाबाद दरम्यान प्रवास करणाऱ्या प्रवाशांसाठी भारतीय रेल्वेने एक अत्यंत आनंदाची बातमी दिली आहे. या मार्गावरील वंदे भारत एक्सप्रेसची वाढती लोकप्रियता आणि प्रवाशांची गर्दी लक्षात घेता, रेल्वेने ट्रेनच्या डब्यांची संख्या वाढवण्याचा निर्णय घेतला आहे. आता या हाय-स्पीड ट्रेनमध्ये 16 ऐवजी 20 कोच असतील, ज्यामुळे प्रवाशांना अधिक जागा आणि सुखकर प्रवास उपलब्ध होणार आहे. या निर्णयामुळे मुंबईहून गुजरातकडे जाणाऱ्या प्रवाशांची मोठी सोय होण्यासह प्रवासाला गती मिळणार आहे.
प्रवाशांच्या प्रचंड प्रतिसादानंतर कोचमध्ये वाढ
मुंबई सेंट्रल ते अहमदाबाद दरम्यान धावणारी वंदे भारत एक्सप्रेस ही देशातील 42 वी वंदे भारत आहे. पंतप्रधान नरेंद्र मोदी यांनी 12 मार्च 2024 रोजी या ट्रेनला हिरवा कंदील दाखवला होता आणि 13 मार्च 2024 पासून ही सेवा नियमितपणे सुरू झाली होती. गेल्या 2 वर्षांत या ट्रेनला प्रवाशांचा अभूतपूर्व प्रतिसाद मिळाला आहे. विशेषतः व्यापारी आणि पर्यटकांची वाढती संख्या पाहता, रेल्वे मंत्रालयाने आता यात 4 नवीन एसी कोच जोडण्याचा निर्णय घेतला आहे. यामुळे एकूण प्रवासी क्षमतेत 278 ने वाढ होणार आहे. अतिरिक्त कोचमुळे ऐनवेळी तिकीट मिळण्याची शक्यता वाढली असून, प्रवाशांना गर्दीपासून दिलासा मिळणार आहे.
हेही वाचा – Affordable Cars: आता दुचाकीच्या किंमतीत खरेदी करा अलिशान कार, साडेतीन लाखांपासून ते…; जाणून घ्या
5 तास 40 मिनिटांत मुंबई ते अहमदाबाद
मुंबई सेंट्रल ते अहमदाबाद हे 491 किमीचे अंतर ही ट्रेन केवळ 5 तास 40 मिनिटांत पूर्ण करते. सरासरी 90 किमी प्रति तास वेगाने धावणारी ही एक्सप्रेस बोरीवली, वापी जंक्शन, सुरत आणि वडोदरा जंक्शन या स्थानकांवर थांबते. 2019 मध्ये सुरू झालेल्या वंदे भारत मोहिमेअंतर्गत आतापर्यंत देशभरात एकूण 160 वंदे भारत एक्सप्रेस कार्यरत आहेत. प्रवाशांच्या सोयीनुसार आता वर्दळीच्या मार्गांवर डब्यांची संख्या 20 पर्यंत वाढवण्याचे काम रेल्वेकडून युद्धपातळीवर सुरू आहे. यामुळे रेल्वेसह प्रवाशांना फायदा मिळणार आहे.
मर्यादित कालावधीसाठी विशेष सुविधा
रेल्वेने दिलेल्या अधिकृत माहितीनुसार, ही सुविधा तात्पुरत्या स्वरूपात (Temporary) उपलब्ध करून देण्यात आली आहे. 9 मार्च 2026 ते 31 मार्च 2026 या कालावधीत ही ट्रेन 20 कोचसह धावेल. मार्च महिन्यातील गर्दीचा हंगाम (Peak Season) लक्षात घेऊन प्रवाशांचा प्रवास आरामदायक व्हावा आणि वेटिंग लिस्ट कमी व्हावी, या उद्देशाने हा निर्णय घेण्यात आला आहे. सेमी-हाय-स्पीड श्रेणीतील या ट्रेनची मागणी सातत्याने वाढत असल्याने रेल्वेकडून हा मोठा बदल करण्यात आला आहे. पश्चिम रेल्वेने (Western Railway) घेतलेल्या या निर्णयाचे प्रवाशांकडून स्वागत होत आहे. रेल्वे आता भविष्यात कायमस्वरूपी 20 कोचची यंत्रणा राबवणार का, याकडे सर्वांचे लक्ष लागले आहे.
