US Iran Peace Deal: आपल्या धडाकेबाज आणि अनपेक्षित निर्णयांसाठी प्रसिद्ध असलेले अमेरिकेचे राष्ट्राध्यक्ष डोनाल्ड ट्रम्प यांनी इराण संदर्भातील शांतता करारावर एक मोठे विधान केले आहे. दोन्ही देशांमधील संघर्ष संपवण्यासाठी स्वाक्षरी करण्यात आलेला सामंजस्य करार (MoU) हा पूर्णपणे अंतिम नसून तो केवळ एक तात्पुरता मसुदा असल्याचे ट्रम्प यांनी स्पष्ट केले. जर इराणने आपल्या वर्तनात सुधारणा केली नाही आणि करारातील अटी पाळल्या नाहीत, तर अमेरिका पुन्हा एकदा लष्करी कारवाई आणि बॉम्बफेक सुरू करू शकते, असा थेट इशारा ट्रम्प यांनी बुधवारी दिला.
फ्रान्समधील 'G7' परिषदेत ट्रम्प यांनी स्पष्ट केली भूमिका
फ्रान्समध्ये आयोजित करण्यात आलेल्या 'G7' शिखर परिषदेदरम्यान डोनाल्ड ट्रम्प यांनी इजिप्तचे राष्ट्राध्यक्ष अब्देल फताह अल-सिसी यांच्यासोबत माध्यमांशी संवाद साधला. या वेळी पत्रकारांनी अमेरिका आणि इराण यांच्यातील कराराच्या सद्यस्थितीबद्दल विचारले असता, ट्रम्प यांनी हा करार अंतिम नसल्याचे स्पष्ट केले. करारातील मसुदा किंवा इराणची भूमिका आगामी काळात अमेरिकेच्या हिताची वाटली नाही, तर वॉशिंग्टन तात्काळ आपले आक्रमक धोरण पुन्हा लागू करेल, असे संकेत त्यांनी दिले.
गेल्या 47 वर्षांपासून इराणचे वर्तन चुकीचे; ट्रम्प यांचा थेट हल्ला
माध्यमांच्या प्रश्नांना उत्तर देताना ट्रम्प कमालीच्या आक्रमक पवित्र्यात दिसले. ते म्हणाले, "हा कोणताही अंतिम निर्णय नसून केवळ एक सामंजस्य करार आहे. जर मला यातील अटी आवडल्या नाहीत किंवा त्यांनी योग्य वर्तन ठेवले नाही, तर आम्ही थेट त्यांच्यावर गोळीबार करू आणि त्यांच्यावर बॉम्ब टाकू." इराणच्या भूतकाळातील भूमिकेवर तीव्र आक्षेप घेत ट्रम्प पुढे म्हणाले की, गेल्या 47 वर्षांपासून इराणने सातत्याने चुकीचे वर्तन केले आहे. त्यामुळे त्यांनी हा करार गांभीर्याने घेतला नाही, तर अमेरिका लष्करी बळाचा वापर करण्यास मागेपुढे पाहणार नाही.
