Oman Gulf Attack: ओमानच्या आखातामध्ये एका मालवाहू जहाजावर अमेरिकन सैन्याने केलेल्या थेट हल्ल्यात तीन भारतीय खलाशांचा दुर्दैवी मृत्यू झाला आहे. सुरुवातीला हे तिन्ही खलाशी बेपत्ता असल्याचे सांगण्यात येत होते, मात्र आता त्यांच्या मृत्यूची अधिकृत माहिती मिळाली आहे. केंद्रीय बंदरे, जहाजबांधणी आणि जलमार्ग मंत्री सर्बानंद सोनोवाल यांनी या अत्यंत संवेदनशील आणि धक्कादायक घटनेची माहिती दिली. ‘एमटी सेट्टेबेलो’ (MT Settebello) असे हल्ला झालेल्या जहाजाचे नाव असून त्यावर ‘पलाऊ’ या देशाचा ध्वज होता. अमेरिका आणि इराण यांच्यात सुरू असलेल्या तीव्र तणावाच्या पार्श्वभूमीवर, होर्मुझच्या सामुद्रधुनीजवळ अमेरिकेच्या सेंट्रल कमांडने (CENTCOM) या तेल टँकरला लक्ष्य केले. या टँकरवर इराणवरील आर्थिक निर्बंधांचे उल्लंघन करून तेल वाहतूक केल्याचा आरोप अमेरिकेकडून ठेवण्यात आला आहे.
जहाजावर 24 भारतीयांसह 28 कर्मचारी होते तैनात
ज्यावेळी अमेरिकन नौदलाने या टँकरवर हल्ला केला, त्यावेळी त्यावर एकूण 28 जण कार्यरत होते. यामध्ये 24 भारतीय नागरिकांचा समावेश होता, तर उर्वरित 4 जणांमध्ये दोन पाकिस्तानी, एक युक्रेनियन आणि एक रशियन नागरिक होता. या हल्ल्यानंतर कंपनीच्या व्यवस्थापनाला जहाजावरील इतर वाचलेल्या कर्मचाऱ्यांशी संपर्क साधण्यात मोठ्या अडचणी येत आहेत.
मृत्यू झालेल्या भारतीय खलाशांची नावे:
पटनाला सुरेश (मुख्य अभियंता / चीफ इंजिनिअर)
शिवानंद चौरसिया (इंजिन फिटर)
आदित्य शर्मा (डेक कॅडेट)
केंद्रीय मंत्र्यांनी ‘X’ वरून दिली माहिती; भारताकडून तीव्र निषेध
दरम्यान, केंद्रीय मंत्री सर्बानंद सोनोवाल यांनी सोशल मीडिया प्लॅटफॉर्म ‘X’ वर पोस्ट करत या घटनेबद्दल तीव्र दुःख व्यक्त केले आहे. त्यांनी म्हटलं आहे की, “एमटी सेट्टेबेलो जहाजावरील ही घटना अत्यंत वेदनादायी आहे. बेपत्ता असलेल्या तीन भारतीय खलाशांपैकी दोघांचे मृतदेह हाती आले असून त्यांच्या मृत्यूची खात्री झाली आहे. जहाजावरील इतर सुरक्षित कर्मचाऱ्यांना तातडीने भारतात सुखरूप परत आणण्यासाठी आणि शहीदांचे पार्थिव लवकरात लवकर मायदेशी पाठवण्यासाठी मी संबंधित अधिकाऱ्यांना कडक निर्देश दिले आहेत.”
It is deeply unfortunate to learn of the tragic incident aboard the Palau-flagged MT Settebello. Sadly, three Indian seafarers initially reported missing are now confirmed dead after bodies have been located and identified. This is a profound loss to our maritime family. The… — Sarbananda Sonowal (@sarbanandsonwal) June 11, 2026
भारताची भूमिका –
भारताने या आंतरराष्ट्रीय सागरी क्षेत्रातील लष्करी कारवाईचा आणि हल्ल्याचा तीव्र निषेध केला आहे. हे जहाज होर्मुझच्या सामुद्रधुनीतून जात असताना अमेरिकेने आंतरराष्ट्रीय नियमांना बाजूला सारून हा हल्ला केल्याचे सांगण्यात येत आहे, ज्यामुळे निष्पाप भारतीय खलाशांना आपले प्राण गमवावे लागले.
