Nurse Death : निपाह सारख्या जीवघेण्या विषाणू संसर्गावर यशस्वी मात केल्यानंतरही, पश्चिम बंगालमधील एका तरुण नर्सचा दुर्दैवी अंत झाला आहे. उत्तर 24 परगणा जिल्ह्यातील बारासत येथील एका खाजगी रुग्णालयात गुरुवारी या 25 वर्षीय नर्सचा हृदयविकाराच्या झटक्याने मृत्यू झाला. निपाह संसर्गातून पूर्णपणे बरी झाल्यामुळे तिला व्हेंटिलेटरवरून बाहेर काढण्यात आले होते, मात्र इतर शारीरिक गुंतागुंतीमुळे तिची प्राणज्योत मालवली.
निपाहवर मात, पण गुंतागुंत ठरली जीवघेणी
राज्य आरोग्य विभागाच्या अधिकाऱ्यांनी दिलेल्या माहितीनुसार, या वर्षाच्या सुरुवातीला पश्चिम बंगालमध्ये दोन आरोग्य कर्मचाऱ्यांना निपाहची लागण झाली होती. त्यापैकी ही महिला नर्स एक होती. ‘ती निपाह संसर्गातून बरी झाली होती आणि जानेवारी महिन्याच्या अखेरीस तिला व्हेंटिलेटर सपोर्टवरूनही काढण्यात आले होते. मात्र, दीर्घकाळ कोमात राहिल्यामुळे तिची रोगप्रतिकारशक्ती अत्यंत कमकुवत झाली होती,’ असे अधिकाऱ्यांनी सांगितले.
शुद्धीवर येण्याचा प्रयत्न आणि अचानक प्रकृती बिघडली
पूर्व वर्धमान जिल्ह्यातील कटवा येथील रहिवासी असलेली ही नर्स गेल्या अनेक दिवसांपासून मृत्यूशी झुंज देत होती. उपचारादरम्यान तिला फुफ्फुसाचा संसर्ग (Lung Infection) झाला होता. रुग्णालयातील सूत्रांनी सांगितले की, ‘ती शुद्धीवर येण्याचा, हातपाय हलवण्याचा आणि बोलण्याचा प्रयत्न करत होती. सर्वकाही सकारात्मक वाटत असतानाच दुपारी अचानक तिला हृदयविकाराचा झटका आला आणि सायंकाळी 4:20 वाजता तिचे निधन झाले.’
प्रवासाचा इतिहास आणि आजारपणाची सुरुवात
ही नर्स 31 डिसेंबर रोजी नवीन वर्षाच्या सुट्टीसाठी आपल्या घरी परतली होती. जानेवारी महिन्याच्या सुरुवातीला तिला पहिल्यांदा ताप आणि इतर लक्षणे दिसू लागली. सुरुवातीला तिला बर्दवान मेडिकल कॉलेज आणि हॉस्पिटलमध्ये दाखल करण्यात आले होते, परंतु प्रकृती अधिक खालावल्याने तिला बारासत येथील खाजगी रुग्णालयात हलवण्यात आले होते. दरम्यान, तिच्यासोबत निपाहची लागण झालेला दुसरा पुरुष पूर्णपणे बरा होऊन घरी परतला आहे.
The nurse who was infected with Nipah virus has died. The reason for the death is cardiac arrest: Health Department, Government of West Bengal — ANI (@ANI) February 12, 2026
आरोग्य विभागासमोर नवीन आव्हाने
या घटनेमुळे आरोग्य वर्तुळात चिंता व्यक्त केली जात आहे. निपाह संसर्गातून रुग्ण बरा झाल्यानंतरही त्याच्या शरीरावर होणारे दीर्घकालीन परिणाम आणि कमकुवत प्रतिकारशक्ती याकडे विशेष लक्ष देण्याची गरज असल्याचे या घटनेवरून स्पष्ट झाले आहे. एका तरुण नर्सचा अशा प्रकारे अंत झाल्याने राज्यभरातून हळहळ व्यक्त होत आहे.
