Ind vs Eng T20 World Cup : T-20 विश्वचषक 2026 च्या अत्यंत चुरशीच्या 2 ऱ्या उपांत्य सामन्यात भारताने इंग्लंडवर 7 धावांनी थरारक विजय मिळवून अंतिम फेरीत धडक मारली आहे. वानखेडे स्टेडियमवर झालेल्या या सामन्यात भारताने प्रथम फलंदाजी करताना 253/7 धावांचा डोंगर उभा केला होता. या आव्हानाचा पाठलाग करताना इंग्लंडचा संघ झुंजार खेळी करूनही लक्ष्यापासून काही पावले दूर राहिला. या विजयासोबतच भारताने आता विश्वविजेतेपदाच्या ट्रॉफीवर नाव कोरण्यासाठी अंतिम फेरीत न्यूझीलंडशी लढत निश्चित केली आहे.
संजू सॅमसनची वादळी खेळी; 253 धावांचे विशाल लक्ष्य
नाणेफेक हारल्यानंतर प्रथम फलंदाजीसाठी उतरलेल्या भारतीय संघाला संजू सॅमसनने आक्रमक सुरुवात करून दिली. सॅमसनने अवघ्या 42 चेंडूत 8 चौकार आणि 7 उत्तुंग षटकारांसह 89 धावांची स्फोटक खेळी केली. त्याला शिवम दुबे, इशान किशन, हार्दिक पंड्या आणि तिलक वर्मा यांनी मोलाची साथ दिल्याने भारताला 20 षटकांत 253 धावांपर्यंत पोहोचता आले. इंग्लंडकडून जोफ्रा आर्चर सर्वात महागडा गोलंदाज ठरला, त्याने 4 षटकांत 61 धावा मोजल्या. विल जॅक्स आणि आदिल रशीद यांनी प्रत्येकी 2 बळी घेतले.
WE ARE INTO THE FINAL ?#TeamIndia win by 7⃣ runs in Mumbai ? Scorecard ▶️ https://t.co/LxSBs3EDPx#T20WorldCup | #MenInBlue | #ENGvIND pic.twitter.com/C6Yh6ZTd7d — BCCI (@BCCI) March 5, 2026
कर्णधार सूर्यकुमार यादवची यशस्वी सुरुवात
या स्पर्धेत पहिल्यांदाच आयसीसी (ICC) स्पर्धेचे नेतृत्व करणाऱ्या सूर्यकुमार यादवने आपल्या रणनीतीने सर्वांना प्रभावित केले. दुसऱ्या बाजूला इंग्लंडचा कर्णधार हॅरी ब्रूक यानेही चुरशीची लढत दिली, मात्र अनुभवी भारतीय गोलंदाजीसमोर इंग्लंडला विजय खेचून आणता आला नाही. 2024 च्या विश्वचषकात रोहित शर्माच्या नेतृत्वाखाली भारताने इंग्लंडला हरवून जेतेपद मिळवले होते, त्या इतिहासाची पुनरावृत्ती करत सूर्यकुमारच्या पलटणने पुन्हा एकदा ब्रिटीशांना घरचा रस्ता दाखवला आहे. टी-20 विश्वचषकाच्या इतिहासात भारत आणि इंग्लंड उपांत्य फेरीत आतापर्यंत दोन वेळा एकमेकांसमोर आले होते. या विजयामुळे भारताने आता या द्वंद्वात आघाडी घेतली आहे. संजू सॅमसनच्या धडाकेबाज फलंदाजीमुळे भारतीय चाहत्यांमध्ये आनंदाचे वातावरण असून सोशल मीडियावर टीम इंडियावर अभिनंदनाचा वर्षाव होत आहे. आता सर्वांचे लक्ष न्यूझीलंडविरुद्ध होणाऱ्या महाअंतिम सामन्याकडे लागले आहे.
