PCB Fine: भारत आणि श्रीलंका यांनी आयोजित केलेल्या 2026 च्या टी-20 विश्वचषकात पाकिस्तानचा संघ सुपर 8 मध्येच बाहेर पडल्याने पाकिस्तान क्रिकेट बोर्डाने (PCB) खेळाडूंना 'असामान्य' शिक्षा सुनावली आहे. संघाच्या अत्यंत निराशाजनक कामगिरीची दखल घेत पीसीबीने प्रमुख खेळाडू बाबर आझम, शाहीन आफ्रिदी आणि कर्णधार सलमान अली आगा यांच्यावर लाखो रुपयांचा दंड ठोठावला आहे. 'एक्सप्रेस ट्रिब्यून'ने दिलेल्या वृत्तानुसार, खेळाडूंच्या खराब कामगिरीचा परिणाम आता त्यांच्या खिशावर होत असून, बोर्डाने शिस्त आणि कामगिरीबाबत कठोर भूमिका घेतली आहे.
अपमानजनक पराभवानंतर 50 लाखांचा दंड; पीसीबीचा कडक इशारा
टी-20 विश्वचषकातील विशेषतः भारताविरुद्धच्या मानहानीकारक पराभवानंतर पीसीबीने हा निर्णय घेतला आहे. सूत्रांनी दिलेल्या माहितीनुसार, बोर्डाने प्रत्येक प्रमुख खेळाडूला 50 लाख पाकिस्तानी रुपयांचा दंड ठोठावला आहे. पीसीबीच्या अधिकाऱ्यांनी खेळाडूंना स्पष्ट शब्दांत सुनावले आहे की, "आतापर्यंत तुमचे खूप लाड झाले, पण आता आर्थिक लाभ केवळ मैदानावरील चांगल्या कामगिरीवरच अवलंबून असतील." या विश्वचषकात पाकिस्तानने नेदरलँड्सविरुद्ध कसाबसा विजय मिळवला आणि अमेरिकेला हरवले, मात्र मोठ्या सामन्यांमध्ये संघ पूर्णपणे अपयशी ठरला.
कामगिरी सुधारली नाही तर आर्थिक लाभ रोखणार
पाकिस्तानी खेळाडूंच्या कामगिरीवर केवळ चाहतेच नव्हे, तर बोर्डाचे उच्चाधिकारीही प्रचंड संतापलेले आहेत. अधिकाऱ्यांनी स्पष्ट केले आहे की, ज्याप्रमाणे विजयानंतर खेळाडूंना मोठे बक्षीस दिले जाते, त्याचप्रमाणे खराब कामगिरीसाठी त्यांना दंडही भरावा लागेल. "चांगल्या कामगिरीसाठी बक्षीस आणि खराब कामगिरीसाठी शिक्षा" असे नवे धोरण आता पीसीबीने अवलंबले आहे. भविष्यात खेळाडूंच्या कामगिरीवर आधारितच त्यांना मिळणारे बोनस आणि इतर भत्ते निश्चित केले जातील, असा इशाराही यावेळी देण्यात आला आहे.
हेही वाचा –
पाकिस्तानी खेळाडूंचे वेतन आणि श्रेणी (Contract Categories)
पाकिस्तानच्या राष्ट्रीय खेळाडूंना सध्या दरमहा लाखो रुपये पगार मिळतो. A-श्रेणीतील खेळाडूंना मासिक 4.5 दशलक्ष रुपये आणि आयसीसी महसुलातून 2.07 दशलक्ष रुपये मिळतात. B-श्रेणीसाठी मासिक 3 दशलक्ष, तर C-श्रेणीसाठी 1 दशलक्ष रुपये पगार निश्चित आहे. अगदी D-श्रेणीतील खेळाडूंनाही मासिक 7,50,000 रुपये वेतन मिळते. याशिवाय त्यांना प्रत्येक सामन्याचे स्वतंत्र शुल्क (Match Fee) देखील दिले जाते. इतके मोठे वेतन मिळूनही जागतिक स्तरावर संघ अपयशी ठरल्याने बोर्डाने आता दंडाचा बडगा उचलला आहे.
