England vs New Zealand Test 2026: लॉर्ड्सच्या ऐतिहासिक मैदानावर झालेला इंग्लंड आणि न्यूझीलंडमधील पहिला कसोटी सामना अत्यंत थरारक वळणावर संपला. या सामन्यात इंग्लंडने न्यूझीलंडवर 115 धावांनी दणदणीत विजय मिळवला. गोलंदाजांसाठी नंदनवन ठरलेल्या या खेळपट्टीवर दोन्ही संघांच्या फलंदाजांची मोठी तारांबळ उडाली. तांत्रिकदृष्ट्या हा सामना अवघ्या 3 दिवसांतच संपला, कारण दुसऱ्या दिवशी पावसामुळे 10 षटकांचा खेळही होऊ शकला नव्हता. या विजयासह 3 सामन्यांच्या कसोटी मालिकेत इंग्लंडने 1-0 अशी महत्त्वपूर्ण आघाडी घेतली आहे. विशेष म्हणजे, या संपूर्ण सामन्यात पडलेल्या सर्व 40 विकेट्स घेण्याचा पराक्रम वेगवान गोलंदाजांनी (Fast Bowlers) केला.
फिलिप्स आणि कॉनवेची अपयशी झुंज
सामन्याच्या शेवटच्या दिवशी न्यूझीलंडला विजयासाठी 254 धावांचे कठीण आव्हान मिळाले होते. आदल्या दिवशी 55 धावांत 5 विकेट्स गमावून संकटात सापडलेल्या न्यूझीलंडला शेवटच्या दिवशी सुरुवातीलाच मोठा धक्का बसला. जॉश टंगने दिवसाच्या सातव्याच चेंडूवर टॉम ब्लंडेलला अवघ्या 4 धावांवर पायचित (LBW) केले. त्यानंतर ग्लेन फिलिप्स आणि डेवॉन कॉनवे यांनी मिळून डाव सावरण्याचा प्रयत्न केला आणि संघाचा धावफलक 100 च्या पार नेला. या दोघांनी 58 धावांची भागीदारी केली, पण इंग्लंडचा कर्णधार बेन स्टोक्सने कॉनवेला (41 धावा) बाद करून ही जोडी फोडली. यानंतर न्यूझीलंडचा डाव पत्त्याच्या बंगल्यासारखा कोसळला आणि संपूर्ण संघ 138 धावांवर ऑलआऊट झाला. ग्लेन फिलिप्सने 52 चेंडूत 44 धावांची नाबाद आणि झुंजार खेळी केली, ज्यामध्ये 7 चौकार आणि 1 षटकाराचा समावेश होता. इंग्लंडकडून दुसऱ्या इनिंगमध्ये गस अटकिनसनने उत्कृष्ट गोलंदाजी करत 5 विकेट्स घेतल्या, तर ओली रॉबिनसन आणि जॉश टंग यांनी प्रत्येकी 2-2 बळी मिळवले.
पहिल्या इनिंगमधील फ्लॉप शो आणि सामन्याचा लेखाजोखा
या सामन्याची सुरुवात इंग्लंडसाठी अत्यंत खराब झाली होती. पहिल्या इनिंगमध्ये न्यूझीलंडच्या काईल जेमिसनच्या (5 विकेट्स) भेदक गोलंदाजीसमोर इंग्लंडचा पहिला डाव अवघ्या 140 धावांवर आटोपला होता. मात्र, न्यूझीलंडलाही या स्थितीचा फायदा घेता आला नाही. 2024 नंतर कसोटी संघात पुनरागमन करणाऱ्या ओली रॉबिनसनने 5 विकेट्स काढल्यामुळे न्यूझीलंडचा पहिला डाव अवघ्या 113 धावांत आटोपला.
पहिल्या इनिंगच्या जोरावर इंग्लंडने दुसऱ्या इनिंगमध्ये फलंदाजी सुधारली. पदार्पणाचा सामना खेळणाऱ्या इमिलियो गे याने 57 धावांची महत्त्वपूर्ण अर्धशतकी खेळी केली. त्याला जेमी स्मिथ (39 धावा), बेन डकेट (33 धावा) आणि ओली रॉबिनसन (29 धावा) यांनी चांगली साथ दिली. यामुळे इंग्लंडला दुसऱ्या इनिंगमध्ये 226 धावांपर्यंत मजल मारता आली आणि न्यूझीलंडसमोर विजयासाठी 254 धावांचे कठीण आव्हान उभे राहिले, जे न्यूझीलंडला पार करता आले नाही.
