India vs Sri Lanka : श्रीलंकेविरुद्धच्या सराव सामन्यात भारतीय क्रिकेट संघाने शानदार कामगिरी करत 6 गडी राखून दणदणीत विजय मिळवला आहे. या विजयात देवदत्त पडिक्कलचे दमदार शतक आणि रवींद्र जडेजाचे महत्त्वपूर्ण योगदान राहिले असले, तरी सामन्याचा खरा थरार जलदगती गोलंदाज मोहम्मद सिराजच्या फटकेबाजीने निर्माण केला. सामन्याच्या अंतिम टप्प्यात फलंदाजीला आलेल्या सिराजने आक्रमक रूप धारण करत अवघ्या 15 चेंडूंत 32 धावांची नाबाद खेळी केली. यामध्ये त्याने एकामागोमाग एक 4 उत्तुंग षटकार ठोकून भारताच्या विजयावर शिक्कामोर्तब केले. सिराजचा हा अनोखा आणि स्फोटक अवतार पाहून डगआऊटमध्ये बसलेले मुख्य प्रशिक्षक गौतम गंभीर यांनाही हसू आवरले नाही.
दुसऱ्या डावात जयस्वाल अन् गिलची भक्कम पायाभरणी
दरम्यान, श्रीलंकेने भारतासमोर विजयासाठी 206 धावांचे आव्हान ठेवले होते. या लक्ष्याचा पाठलाग करताना भारतीय सलामीवीर यशस्वी जयस्वालने 61 धावांची अर्धशतकी खेळी केली आणि तो रिटायर्ड हर्ट होऊन मैदानाबाहेर गेला. त्याच्यासोबत फलंदाजी करणाऱ्या शुभमन गिलने 44 धावांचे योगदान देत संघाला मजबूत सुरुवात करून दिली. मध्यक्रमातील इतर फलंदाजांना मोठी धावसंख्या उभारता आली नाही, मात्र अखेरच्या टप्प्यात सारांश जैनने 7 चेंडूंत 2 धावा करत सिराजला योग्य साथ दिली आणि भारताला 6 विकेट्सने विजय मिळवून दिला.
DSP GOES 6️⃣ 6️⃣ 6️⃣! ? Mohammed Siraj signs off the warm-up game with three sixes on the trot! ? #SonySportsNetwork #SonyLIV #BeautifulGameofTestCricket pic.twitter.com/poApnwLVwu — Sony Sports Network (@SonySportsNetwk) August 9, 2026
पहिल्या डावात देवदत्त पडिक्कलचे शानदार शतक
नाणेफेक जिंकून प्रथम फलंदाजी करणाऱ्या श्रीलंका संघाने 8 बाद 363 धावांवर आपला पहिला डाव घोषित केला होता. प्रत्युत्तरात फलंदाजीला उतरलेल्या भारतीय संघाची सुरुवात निराशाजनक झाली. यशस्वी जयस्वाल 0 वर तर के. एल. राहुल 40 धावांवर बाद झाला. या कठीण प्रसंगात रवींद्र जडेजाने 63 धावांची संयमी खेळी करत डाव सावरला. तसेच रिषभ पंत 2 आणि ध्रुव जुरेल 1 धाव काढून लवकर बाद झाले. मात्र, दुसऱ्या बाजूने देवदत्त पडिक्कलने अप्रतिम फलंदाजी करत 142 धावांचे नाबाद शतक ठोकले. त्याला मानव सुथारच्या 41 आणि गुरनूर ब्रारच्या 36 धावांची मोलाची साथ मिळाली, ज्यामुळे भारताने पहिल्या डावात 6 गड्यांच्या मोबदल्यात 357 धावांपर्यंत मजल मारली होती.
