IND vs NED: जगातील सर्वात मोठे क्रिकेट स्टेडियम असलेल्या अहमदाबादमधील नरेंद्र मोदी स्टेडियमवर आज भारत आणि नेदरलँड्स यांच्यात टी-20 विश्वचषकाचा थरार रंगत आहे. भारतीय कर्णधार सूर्यकुमार यादवने नाणेफेक (Toss) जिंकून प्रथम फलंदाजी करण्याचा निर्णय घेतला आहे. नेदरलँड्सचा संघ आता धावांच्या लक्ष्याचा पाठलाग करण्यासाठी मैदानात उतरेल.
टीम इंडियामध्ये दोन बदल; वॉशिंग्टन सुंदरला संधी
आजच्या महत्त्वाच्या सामन्यासाठी भारतीय संघात दोन मोठे बदल करण्यात आले आहेत. फिरकीपटू कुलदीप यादव आणि अक्षर पटेल यांना विश्रांती देण्यात आली असून त्यांच्या जागी वॉशिंग्टन सुंदर आणि अर्शदीप सिंग यांचा समावेश करण्यात आला आहे. विशेष म्हणजे, वॉशिंग्टन सुंदर हा आपल्या कारकिर्दीतील पहिलाच विश्वचषक सामना खेळत आहे, ज्यामुळे चाहत्यांमध्ये मोठी उत्सुकता आहे.
नेदरलँड्ससमोर मोठे आव्हान
भारत आणि नेदरलँड्स यांच्यात यापूर्वी फक्त एकच टी-20 आंतरराष्ट्रीय सामना झाला आहे, ज्यामध्ये भारताने निर्विवाद वर्चस्व गाजवत नेदरलँड्सचा पराभव केला होता. या वर्षीच्या विश्वचषकात नेदरलँड्सची कामगिरी आतापर्यंत निराशाजनक राहिली आहे. दुसरीकडे, 1 लाखांहून अधिक प्रेक्षकांच्या उपस्थितीत खेळल्या जाणाऱ्या या सामन्यात भारत मोठी धावसंख्या उभारून नेदरलँड्सवर दबाव टाकण्याच्या प्रयत्नात असेल.
हेही वाचा – Former Captain Retirement: मोठी बातमी, T20 विश्वचषक 2026 दरम्यान माजी कर्णधाराची निवृत्तीची घोषणा
दोन्ही संघांची प्लेइंग इलेव्हन
भारत: इशान किशन (WK), अभिषेक शर्मा, तिलक वर्मा, सूर्यकुमार यादव (C), हार्दिक पंड्या, शिवम दुबे, रिंकू सिंग, वॉशिंग्टन सुंदर, अर्शदीप सिंग, वरुण चक्रवर्ती, जसप्रीत बुमराह.
नेदरलँड्स: मायकेल लेविट, मॅक्स ओ'डाउड, बास डी लीडे, कॉलिन अकरमन, स्कॉट एडवर्ड्स (C/WK), झॅक लिऑन-कॅचेट, रोएलॉफ व्हॅन डर मेरवे, लोगान व्हॅन बीक, आर्यन दत्त, काइल क्लेन, पॉल व्हॅन मीकरेन.
