Rajpal Yadav Bail Update : प्रसिद्ध अभिनेता राजपाल यादव सध्या 16 वर्षे जुन्या चेक बाउन्स प्रकरणामुळे कायदेशीर कचाट्यात सापडला आहे. 5 फेब्रुवारी 2026 रोजी राजपाल यादवला दिल्लीच्या तिहार तुरुंगात आत्मसमर्पण करावे लागले होते, त्यानंतर त्याने जामिनासाठी अर्ज केला होता. या अर्जावर आज, 16 फेब्रुवारी रोजी दिल्ली उच्च न्यायालयात सुनावणी झाली. न्यायालयाने राजपालचा जामीन अर्ज मंजूर केला असला तरी, त्यासाठी एक कडक अट घातली आहे. अभिनेत्याला आज दुपारी 3 वाजेपर्यंत 1.5 कोटी रुपयांचा डिमांड ड्राफ्ट (DD) न्यायालयात जमा करावा लागणार आहे.
कौटुंबिक कारणासाठी जामिनाची मागणी
राजपाल यादवने आपल्या भाचीच्या लग्नासाठी जामिनाची विनंती केली होती, जे लग्न 19 फेब्रुवारी रोजी होणार आहे. उच्च न्यायालयाने स्पष्ट केले आहे की, जर आज दुपारी 3 वाजेपर्यंत रक्कमेचा डिमांड ड्राफ्ट सादर केला, तरच त्याला जामीन मिळेल. या अटीची पूर्तता न झाल्यास, या प्रकरणाचा पुढील निर्णय उद्या, 17 फेब्रुवारी रोजी जाहीर केला जाईल. यापूर्वी 12 फेब्रुवारी रोजी झालेल्या सुनावणीत न्यायालयाने अभिनेत्याच्या वकिलाला चांगलेच फटकारले होते आणि युक्तिवाद फेटाळून लावले होते.
न्यायालयाची कडक टिप्पणी आणि फसवणुकीचा आरोप
सुनावणीदरम्यान न्यायालयाने नमूद केले की, राजपाल यादवला पैसे परत करण्यासाठी यापूर्वी 25 ते 30 वेळा संधी देण्यात आली होती, परंतु तो आपले वचन पूर्ण करण्यात अपयशी ठरला. अभिनेत्याने आपली शिक्षा रद्द करण्याची मागणी केली होती, मात्र आधीच कर्ज घेतल्याचे कबूल केल्यावर सवलत कशी देता येईल, असा प्रश्न न्यायालयाने उपस्थित केला. राजपालच्या वकिलाच्या दाव्यानुसार, कर्जाच्या रकमेपैकी 3 कोटी रुपयांहून अधिक रक्कम परत करण्यात आली आहे आणि आता याचिकाकर्त्याला केवळ 2.10 कोटी रुपये जमा करायचे आहेत.
काय आहे 16 वर्षे जुने प्रकरण?
हे संपूर्ण प्रकरण 2010 सालापासून सुरू आहे. राजपाल यादवने दिग्दर्शक आणि निर्माता म्हणून 'आता पता लपता' या चित्रपटासाठी मुरली प्रोजेक्ट्स प्रायव्हेट लिमिटेडकडून 5 कोटी रुपयांचे कर्ज घेतले होते. त्या बदल्यात नफा देण्याचे आश्वासन देण्यात आले होते, मात्र पैसे परत न मिळाल्याने कंपनीने कायदेशीर मार्ग स्वीकारला. या चेक बाउन्स प्रकरणात राजपाल आणि त्याच्या पत्नीविरुद्ध खटला दाखल असून, त्याला आतापर्यंत दोनदा तुरुंगवास भोगावा लागला आहे.
