BCCI Central Contracts: बुमराहसाठी BCCI बदलणार नियम; A+ श्रेणी रद्द, तरीही 7 कोटींचे मानधन मिळणार?

BCCI Central Contracts: भारतीय क्रिकेट नियामक मंडळाने (BCCI) 2025-26 हंगामासाठी आपल्या केंद्रीय करारांच्या रचनेत अत्यंत महत्त्वाचा बदल करण्याचा निर्णय घेतला आहे. या नवीन बदलांतर्गत आता 'A+' श्रेणी पूर्णपणे रद्द करण्यात येणार आहे. यापूर्वी या विशेष श्रेणीमध्ये रोहित शर्मा, विराट कोहली, जसप्रीत बुमराह आणि रवींद्र जडेजा या दिग्गज खेळाडूंचा समावेश होता. मात्र, सध्या रोहित आणि कोहली केवळ एकदिवसीय सामने खेळतात, तर जडेजा कसोटी आणि एकदिवसीय क्रिकेटमध्ये सक्रिय आहे. या गटात जसप्रीत बुमराह हा एकमेव असा खेळाडू आहे जो तिन्ही प्रकारच्या (Formats) क्रिकेटमध्ये सातत्याने उपलब्ध असतो. ही श्रेणी रद्द झाल्यामुळे बुमराहच्या मानधनावर परिणाम होण्याची शक्यता असल्याने, बोर्ड आता कराराच्या नियमांत विशेष सुधारणा करण्याच्या विचारात आहे.

जसप्रीत बुमराहला 2 कोटी रुपयांच्या नुकसानाची भीती
'A+' श्रेणीतील खेळाडूंना वार्षिक 7 कोटी रुपयांचे मानधन दिले जात असे. ही श्रेणी रद्द करून बुमराहला आता 'Grade A' मध्ये स्थान देण्यात आले आहे, जिथे वार्षिक मानधन 5 कोटी रुपये इतके आहे. यामुळे बुमराहचे थेट 2 कोटी रुपयांचे आर्थिक नुकसान होऊ शकते. द टाइम्स ऑफ इंडियाच्या वृत्तानुसार, बुमराहची तिन्ही फॉरमॅटमधील अष्टपैलू आणि उत्कृष्ट कामगिरी पाहता, हे नुकसान भरून काढण्यासाठी BCCI नवीन मार्ग शोधत आहे. त्याचे मानधन 7 कोटींवरून 5 कोटींवर आणणे अन्यायकारक ठरेल, अशी भावना निवड समितीमध्ये असल्याने करारांच्या मूल्यांकनात बदल केले जाण्याची दाट शक्यता आहे.

अक्षर पटेलच्या श्रेणीबाबतही पेच निर्माण
केवळ बुमराहच नाही, तर अष्टपैलू खेळाडू अक्षर पटेलच्या बाबतीतही अशीच विसंगती पाहायला मिळत आहे. मर्यादित षटकांच्या सामन्यांमध्ये उत्कृष्ट कामगिरी करणारा आणि कसोटी संघाचा महत्त्वाचा भाग असलेला अक्षर पटेल सध्या 'Grade C' मध्ये आहे. या श्रेणीतील खेळाडूंना वार्षिक केवळ 1 कोटी रुपये मानधन मिळते. त्याच्या कामगिरीच्या तुलनेत हे मानधन कमी असल्याचे बोलले जात असून, बोर्डाला या श्रेणी रचनेचा पुनर्विचार करावा लागू शकतो.

हेही वाचा – IPL 2026: KKR ला दुहेरी झटका तर RCB ची धाकधूक वाढली; आयपीएल सुरू होण्यापूर्वीच बड्या खेळाडूंना दुखापतीचे ग्रहण

2025-26 हंगामासाठी 30 खेळाडूंचे भवितव्य ठरणार
BCCI ने 2025-26 च्या हंगामासाठी एकूण 30 खेळाडूंचा केंद्रीय करारात समावेश केला आहे. यामध्ये शुभमन गिल, जसप्रीत बुमराह आणि रवींद्र जडेजा यांना 'Grade A' मध्ये स्थान देण्यात आले आहे. याशिवाय 'Grade B' मध्ये 11 खेळाडू आणि 'Grade C' मध्ये 16 खेळाडूंचा समावेश आहे. मात्र, प्रत्येक श्रेणीसाठी यावर्षी नेमके किती मानधन दिले जाईल, याची अधिकृत घोषणा बोर्डाने अद्याप राखून ठेवली आहे. बुमराह आणि अक्षर पटेल यांच्या मानधनाबाबतच्या पेचप्रसंगानंतर बोर्ड लवकरच नवीन पगाररचना जाहीर करेल अशी अपेक्षा आहे.