AUS vs SA: सध्या टी-20 विश्वचषकात धडाकेबाज कामगिरी करणाऱ्या दक्षिण आफ्रिकेच्या संघासाठी आगामी काळ अत्यंत व्यग्र आणि महत्त्वाचा असणार आहे. ऑस्ट्रेलियन क्रिकेट संघ सप्टेंबर ते ऑक्टोबर या कालावधीत दक्षिण आफ्रिकेच्या दौऱ्यावर येणार असून या दौऱ्याचे अधिकृत वेळापत्रक जाहीर करण्यात आले आहे. या दौऱ्यात 3 एकदिवसीय (ODI) आणि 3 कसोटी सामन्यांची मालिका खेळवली जाणार असून, उभय संघांमधील ही लढत अत्यंत अटीतटीची होण्याची शक्यता आहे.
2027 च्या विश्वचषकाची तयारी; 3 एकदिवसीय सामन्यांचा थरार
ऑस्ट्रेलिया आणि दक्षिण आफ्रिका यांच्यातील एकदिवसीय मालिका 24 सप्टेंबर रोजी सुरू होईल. मालिकेतील दुसरा सामना 27 सप्टेंबर रोजी, तर तिसरा आणि अंतिम सामना 30 सप्टेंबर रोजी खेळवला जाईल. पुढील वर्षी, म्हणजेच 2027 मध्ये होणाऱ्या एकदिवसीय विश्वचषकाच्या दृष्टीने ही मालिका दोन्ही संघांसाठी तयारीची मोठी संधी आहे. विशेष म्हणजे, गाजलेल्या 'सँडपेपर गेट' प्रकरणानंतर ऑस्ट्रेलियन संघ पहिल्यांदाच दक्षिण आफ्रिकेच्या भूमीवर द्विपक्षीय मालिका खेळण्यासाठी सज्ज झाला आहे.
WTC फायनलचे तिकीट कोणाला? 3 कसोटी सामन्यांची मालिका
एकदिवसीय मालिकेनंतर आयसीसी जागतिक कसोटी अजिंक्यपद स्पर्धेचा (WTC) भाग असलेली 3 सामन्यांची कसोटी मालिका खेळवली जाईल.
पहिली कसोटी: 9 ते 13 ऑक्टोबर
दुसरी कसोटी: 18 ते 22 ऑक्टोबर
तिसरी कसोटी: 27 ते 31 ऑक्टोबर
दक्षिण आफ्रिका हा जागतिक कसोटी अजिंक्यपद स्पर्धेचा विद्यमान विजेता असल्याने त्यांच्यावर विजेतेपद टिकवून ठेवण्याचे दडपण असेल. या मालिकेतील कामगिरीवरूनच आगामी 'WTC' फायनलमध्ये कोणता संघ स्थान मिळवेल, याचे चित्र स्पष्ट होणार आहे.
लक्ष सध्या टी-20 विश्वचषकावर
मालिका अजून काही महिने लांब असली तरी दक्षिण आफ्रिकेचा संघ सध्या टी-20 विश्वचषकात व्यस्त आहे. 2024 च्या टी-20 विश्वचषकात अंतिम फेरीत भारताकडून पराभव स्वीकारावा लागल्यानंतर, यावेळी एडेन मार्करामच्या नेतृत्वाखाली संघ जेतेपदासाठी प्रयत्नशील आहे. सुपर 8 मध्ये भारताला नमवल्यानंतर आफ्रिकन संघाचा आत्मविश्वास उंचावला असून, ऑस्ट्रेलियन दौऱ्यापूर्वी हे जेतेपद पटकावण्याचा त्यांचा मानस आहे.
