Zeeshan Siddique Threat : माजी मंत्री बाबा सिद्दीकी यांच्या मृत्यूच्या घटनेनंतर आता त्यांचे सुपुत्र तथा राष्ट्रवादी काँग्रेसचे आमदार झिशान सिद्दीकी यांना जीवे मारण्याचा गंभीर इशारा मिळाल्याने राजकीय वर्तुळात मोठी खळबळ उडाली आहे. बाबा सिद्दीकी मृत्यू प्रकरणातील मुख्य संशयित आणि फरार गँगस्टर झिशान अख्तर याने एका व्हॉइस नोटद्वारे ही धमकी दिल्याचा संशय व्यक्त केला जात आहे. परदेशातून आलेल्या या धमकीच्या संदेशानंतर मुंबई पोलीस आणि गुन्हे शाखा हाय अलर्टवर आल्या असून सुरक्षा यंत्रणांनी तपास तीव्र केला आहे.
‘वडिलांच्या वेळी नशिबाने वाचलास, आता सोडणार नाही’
समोर आलेल्या माहितीनुसार, संबंधित व्हॉइस नोटमध्ये गँगस्टरने अत्यंत आक्रमक भाषेत धमकी दिली आहे. "तुझ्या वडिलांचा गेम मीच वाजवला होता, आता तुझी वेळ आहे. माझ्या कामात अडथळा आणणे बंद कर, तुला पोलिसांकडे जितकं पळायचं आहे तितकं पळ," असा इशारा देत त्याने झिशान यांच्याविरोधात फतवा काढल्याचा दावा केला आहे. तसेच वडिलांच्या हत्येच्या वेळी तू सुदैवाने वाचलास, मात्र या वेळी तुला सोडणार नाही, अशी धमकी दिल्याने सिद्दीकी यांच्या सुरक्षेत तातडीने मोठी वाढ करण्यात आली आहे.
बाबा सिद्दीकी मृत्यू प्रकरणाची पार्श्वभूमी आणि पोलीस तपास तातडीने वेगात
दरम्यान, 12 ऑक्टोबर 2024 रोजी वांद्रे पूर्व येथे झिशान सिद्दीकी यांच्या कार्यालयाबाहेरच बाबा सिद्दीकी यांची गोळ्या झाडून हत्या करण्यात आली होती. या प्रकरणात मुंबई पोलिसांनी आतापर्यंत 27 आरोपींविरोधात मकोका कायद्यांतर्गत कारवाई करत गुन्हे दाखल केले आहेत. परदेशातून टोळी चालवणारा झिशान अख्तर या प्रकरणातील प्रमुख वाँटेड आरोपी असून, सध्या पोलीस त्याच्या धमकीच्या डिजिटल व्हॉइस नोटचा फॉरेंसिक तपास करत आहेत.
