Exit Poll 2026 Results: पाच राज्यांच्या विधानसभा निवडणुकांसाठीचा प्रचार आणि मतदान प्रक्रिया पूर्ण झाल्यानंतर आता सर्वांच्या नजरा एक्झिट पोल्सच्या निकालांकडे लागल्या आहेत. पश्चिम बंगाल, आसाम, केरळ, तामिळनाडू आणि पुद्दुचेरी या राज्यांमध्ये झालेल्या मतदानानंतर विविध संस्थांनी आपले अंदाज जाहीर केले आहेत. या अंदाजानुसार, आसाममध्ये भाजप आपली सत्ता राखताना दिसत आहे, तर केरळमध्ये काँग्रेसच्या नेतृत्वाखालील UDF सत्तांतर घडवून आणण्याची दाट शक्यता आहे. पश्चिम बंगालमध्ये मात्र भाजप आणि तृणमूल काँग्रेस (TMC) यांच्यात अत्यंत अटीतटीची लढत पाहायला मिळत आहे.
पश्चिम बंगाल: 150 जागांसह भाजपला आघाडी? की पुन्हा दीदींचेच सरकार?
पश्चिम बंगालमधील 142 जागांसाठीच्या दुसऱ्या आणि अंतिम टप्प्याचे मतदान 29 एप्रिल रोजी पार पडले, ज्यामध्ये 90 टक्क्यांहून अधिक विक्रमी मतदानाची नोंद झाली. 'PMARQ' आणि 'Matrize' सारख्या संस्थांनी भाजपला सुमारे 150 जागांसह स्पष्ट बहुमत मिळण्याचा अंदाज वर्तवला आहे. याउलट, 'People's Pulse' च्या अंदाजानुसार TMC ला 117 ते 187 जागा मिळू शकतात. बंगालमध्ये सत्ता स्थापनेसाठी केवळ जागांची संख्याच नव्हे, तर मतांची टक्केवारी आणि विजयाचा फरक (Margin) निर्णायक ठरणार आहे.
केरळ आणि तामिळनाडू: दक्षिणेत सत्तांतराचे वारे
केरळमधील 140 जागांच्या निकालांबाबत 'News18' च्या मेगा एक्झिट पोलनुसार, काँग्रेसप्रणीत UDF ला 70 ते 80 जागा मिळण्याचा अंदाज आहे, तर सत्ताधारी LDF ला 58 ते 68 जागांवर समाधान मानावे लागू शकते. 'Matrize' ने तर UDF ला 75 ते 85 जागा मिळतील असे म्हटले आहे. तामिळनाडूमध्ये 'DMK+' आघाडी स्पष्टपणे वरचढ दिसत असून त्यांना 122 ते 132 जागा मिळण्याची शक्यता आहे, तर 'AIADMK' पिछाडीवर दिसत आहे. 'TVK' पक्षाला 10 ते 40 जागा मिळतील असा अंदाज वर्तवण्यात आला आहे.
आसाममध्ये भाजपचे 'रिटर्न' तिकीट; बहुमताचा आकडा पार
आसाममध्ये भाजपप्रणीत आघाडी पुन्हा एकदा सत्तेवर येताना दिसत आहे. 'Axis My India' आणि 'JVC' यांसारख्या सर्वेक्षण संस्थांनी भाजपला 85 ते 101 जागा मिळतील असा अंदाज वर्तवला आहे, जो बहुमतासाठी आवश्यक असलेल्या 64 या आकड्यापेक्षा बराच जास्त आहे. काँग्रेस आघाडीला केवळ 23 ते 36 जागा मिळतील असे चिन्हे आहेत. या आकडेवारीवरून आसाममध्ये भाजपचे सरकार स्थापन होणे आता केवळ औपचारिकता मानली जात आहे.
4 मे रोजी होणार अधिकृत निकाल स्पष्ट
निवडणूक आयोगाने जाहीर केल्यानुसार, 4 मे रोजी सर्व राज्यांची अधिकृत मतमोजणी होणार आहे. जरी एक्झिट पोल्समधून राजकीय वातावरणाची दिशा समजत असली, तरी अंतिम निकालात फेरबदल होण्याची शक्यता नाकारता येत नाही. उच्च मतदानाची टक्केवारी कोणाच्या पथ्यावर पडते आणि 4 मे रोजी कोणत्या राज्यात कोणाचे सरकार स्थापन होते, याकडे संपूर्ण देशाचे लक्ष लागले आहे.
