Dattatray Bharne: राज्यातील सत्ताकारणात सध्या नव्या मुख्यमंत्र्यांच्या नावावरून वेगवान घडामोडी सुरू झाल्या आहेत. मुख्यमंत्री देवेंद्र फडणवीस यांची दिल्लीतील केंद्रीय राजकारणात वर्णी लागण्याची शक्यता विरोधकांकडून वर्तवली जात आहे. या पार्श्वभूमीवर राज्याचे नेतृत्व कोणाकडे जाणार, या चर्चांना उधाण आले असतानाच कृषिमंत्री दत्तात्रय भरणे यांनी एक महत्त्वाचे विधान केले आहे. फडणवीस केंद्र सरकारमध्ये गेल्यास राष्ट्रवादी काँग्रेसच्या राष्ट्रीय अध्यक्षा तथा उपमुख्यमंत्री सुनेत्रा पवार यांनी महाराष्ट्राची धुरा सांभाळावी, अशी भूमिका त्यांनी जाहीर केली आहे.
दिल्ली दौऱ्याच्या चर्चांवर कृषिमंत्र्यांची प्रतिक्रिया
देवेंद्र फडणवीस यांच्या आजवरच्या कामाचा उल्लेख करत दत्तात्रय भरणे यांनी त्यांच्या दिल्लीतील संभाव्य भूमिकेचे समर्थन केले. महाराष्ट्रातील एका कर्तृत्ववान नेत्याने देशाच्या सर्वोच्च पातळीवर काम करावे, अशी अनेकांची भावना असल्याचे ते म्हणाले. मात्र, फडणवीस केंद्रात गेल्यास राज्याचे मुख्यमंत्रिपद कोणाकडे येणार, हा प्रश्न महत्त्वाचा ठरेल. प्रत्येक राजकीय कार्यकर्त्याला आपलाच नेता सर्वोच्च पदावर पाहावासा वाटतो, त्यामुळे राष्ट्रवादी काँग्रेसचा प्रतिनिधी म्हणून सुनेत्रा पवार यांनी मुख्यमंत्रिपदाची जबाबदारी स्वीकारावी, अशी आपली इच्छा असल्याचे भरणे यांनी स्पष्ट केले.
अर्थखात्याच्या प्रलंबित निर्णयावर भरणेंचे सूचक विधान
दुसऱ्या बाजूला, दिवंगत अजित पवार यांच्या दुर्दैवी विमान अपघाताला आणि निधनाला आता 5 महिने पूर्ण झाले आहेत. त्यांच्याकडे असलेल्या उपमुख्यमंत्रीपदासह राज्याच्या अत्यंत महत्त्वाच्या अर्थखात्याचा प्रश्न अद्याप अनिर्णित आहे. आगामी अर्थसंकल्प लक्षात घेऊन मुख्यमंत्री फडणवीस यांनी तात्पुरत्या स्वरूपात हे खाते स्वतःकडे ठेवले होते आणि अधिवेशनात त्यांनीच बजेट सादर केले होते.
हे खाते पुन्हा राष्ट्रवादी काँग्रेसकडे सुपूर्द केले जाईल अशा चर्चा होत्या, पण त्यावर अद्याप शिक्कामोर्तब झालेले नाही. या तिढ्यावर बोलताना भरणे यांनी सांगितले की, अर्थखात्याबाबतचा अंतिम निर्णय अद्याप प्रलंबित असून, सुनेत्रा पवार आणि मुख्यमंत्री यांच्यातील चर्चेनंतर यावर लवकरात लवकर तोडगा निघेल अशी अपेक्षा आहे.
