Parliament Protest: संसदेच्या पावसाळी अधिवेशनादरम्यान विरोधकांनी विविध मुद्द्यांवरून केंद्र सरकारला घेरण्याची रणनीती आखली आहे. ‘नीट-यूजी’ (NEET-UG) परीक्षेच्या प्रश्नपत्रिका फुटीविरोधातील सुधारणा विधेयक संसदेत मंजूर झाल्यानंतर विरोधकांनी आता आपला मोर्चा इतर मुद्द्यांकडे वळवला आहे. संसदेच्या परिसरात अयोध्येतील राम मंदिरातील दान चोरीचा मुद्दा आणि केंद्रीय गृहमंत्री अमित शाह यांची अधिवेशनातील अनुपस्थिती यावरून काँग्रेससह ‘इंडिया’ (INDIA) आघाडीच्या खासदारांनी जोरदार व नाट्यमय निषेध नोंदवला. ज्यामुळे संसद भवनातील राजकीय वातावरण चांगलेच तापले.
हेही वाचा – BJP News: भाजपाला मोठा धक्का? बड्या नेत्याचा तडकाफडकी राजीनामा ; कारण अद्याप अस्पष्ट
पप्पू यादव यांचे पुजाऱ्याच्या वेशातील आंदोलन आणि राहुल गांधींचे ‘दान’
अधिवेशनादरम्यान संसद परिसरात एक अनोखे दृश्य पाहायला मिळाले. खासदार पप्पू यादव यांनी पुजाऱ्याचा वेश परिधान करून हातात दानपेटी घेऊन राम मंदिरातील कथित दान चोरीच्या निषेधार्थ प्रातिनिधिक आंदोलन केले. या आंदोलनादरम्यान लोकसभेतील विरोधी पक्षनेते आणि काँग्रेस खासदार राहुल गांधी यांनी पप्पू यादव यांच्या दानपेटीत पैसे टाकून (दान देऊन) आंदोलनाला पाठिंबा दर्शवला; त्यानंतर यादव यांनी ते पैसे आपल्या खिशात ठेवल्याचे दिसले. राम मंदिरातील दानाचा मुद्दा अशा प्रकारे मांडून राहुल गांधी आणि विरोधक नक्की काय साध्य करू पाहत आहेत, याविषयी राजकीय वर्तुळात उलटसुलट चर्चा सुरू झाली आहे.
“अमित शाह संसदेतून गायब का?” विरोधकांची घोषणाबाजी
याच आंदोलनादरम्यान दुसरीकडे विरोधकांनी केंद्रीय गृहमंत्री अमित शाह यांच्या अनुपस्थितीचा मुद्दा लावून धरला. काँग्रेस सरचिटणीस प्रियंका गांधी वाड्रा, काँग्रेस अध्यक्ष तथा राज्यसभेतील विरोधी पक्षनेते मल्लिकार्जुन खर्गे यांच्यासह इंडिया आघाडीच्या प्रमुख खासदारांनी हातात “अमित शाह संसद से गायब क्यों?” असे फलक धरून केंद्र सरकारविरोधात निदर्शने केली. आंदोलक खासदारांनी “चंदा चोरी नहीं चलेगी” आणि “अमित शाह जवाब दो” अशा तीव्र घोषणांनी संसद परिसर दणाणून सोडला. गृहमंत्री अमित शाह यांनी संसदेत उपस्थित राहून प्रश्नांची उत्तरे द्यावीत, अशी मागणी विरोधकांनी यावेळी केली.
