Ram Navami 2026: चैत्र नवरात्रीचा उत्साह सध्या सर्वत्र पाहायला मिळत असून आज या उत्सवाचा तिसरा दिवस आहे. मात्र, या वर्षी 'राम नवमी' आणि 'महा नवमी'च्या नेमक्या तारखेबाबत भाविकांमध्ये काहीसा संभ्रम निर्माण झाला आहे. पंचांगातील तिथीची वेळ आणि उदय तिथीचे महत्त्व यामुळे 26 मार्च की 27 मार्च, असा प्रश्न उपस्थित होत आहे. ज्योतिषशास्त्रीय गणितानुसार या दोन्ही दिवसांचे महत्त्व खालीलप्रमाणे स्पष्ट करण्यात आले आहे.
राम नवमीची नेमकी तारीख आणि तिथी
हिंदू पंचांगानुसार, यावर्षी चैत्र शुद्ध नवमी तिथी 26 मार्च 2026 रोजी सकाळी 11:48 वाजता सुरू होत असून ती दुसऱ्या दिवशी, 27 मार्च 2026 रोजी सकाळी 10:06 वाजेपर्यंत कायम राहणार आहे. यामुळे सामान्य भाविक राम नवमीचा उत्सव 26 मार्च रोजी साजरा करतील. मात्र, जे भाविक वैष्णव परंपरेचे पालन करतात, ते 'उदय तिथी'च्या (सूर्योदयाच्या वेळची तिथी) नियमानुसार 27 मार्च 2026 रोजी प्रभू श्रीरामाचा जन्मोत्सव साजरा करणार आहेत.
महा अष्टमी आणि कन्या पूजन
नवरात्रीचा उपवास सोडण्यासाठी आणि देवीची आराधना करण्यासाठी महत्त्वाची मानली जाणारी 'महा अष्टमी' 26 मार्च 2026 रोजी साजरी केली जाईल. याच दिवशी अनेक घरांमध्ये 'कंजक पूजन' म्हणजेच कुमारिकांची पूजा केली जाते. कन्या पूजनासाठी सकाळी 06:15 ते दुपारी 01:30 हा कालावधी सर्वात शुभ मानला जात असून याच काळात 'हवन' आणि 'विधी' करणे फलदायी ठरेल.
हेही वाचा – Budh Uday 2026 : मेहनत फळणार! बुधाचा उदय अन् 'या' 5 राशींचे नशीब चमकणार; पुढील 40 दिवस..
'सिद्धी योग'चा दुर्मिळ संयोग
2026 सालातील राम नवमीला विशेष आध्यात्मिक महत्त्व प्राप्त झाले आहे. या दिवशी अनेक शुभ नक्षत्रांचा आणि 'सिद्धी योग'चा दुर्मिळ संयोग जुळून आला आहे. ज्योतिष्यांच्या मते, या मुहूर्तावर केलेली उपासना केवळ देवी दुर्गेचाच नव्हे, तर प्रभू श्रीरामाचाही विशेष आशीर्वाद मिळवून देईल. यामुळे भाविकांच्या आयुष्यातील प्रलंबित कामे मार्गी लागतील, अशी धार्मिक श्रद्धा आहे.
