Bhartiya Kamgar Sena 58th Anniversary : भारतीय कामगार सेनेच्या 58 व्या वर्धापन दिनानिमित्त आयोजित सभेत उद्धव ठाकरे यांनी केंद्र सरकार आणि राज्यातील सत्ताधाऱ्यांवर कडाडून टीका केली. “तुमच्यात स्वतःच्या हिंमतीवर निवडणूक जिंकण्याची औकात नाही का?”, असा थेट सवाल त्यांनी भाजपला विचारला. ईडी (ED), सीबीआय (CBI) आणि प्राप्तिकर विभागाचा धाक दाखवून विरोधी पक्षांना छळले जात असल्याचा आरोप त्यांनी केला. निवडणुकीच्या मैदानात फौजा उतरवून आणि तपास यंत्रणांचा गैरवापर करून सत्ता मिळवणे हा लोकशाहीचा अपमान असल्याचे सांगत त्यांनी सत्ताधाऱ्यांच्या कार्यपद्धतीवर प्रश्नचिन्ह उपस्थित केले.
संसदेतील महिला आरक्षणाचे वास्तव
यावेळी उद्धव ठाकरे यांनी आपल्या मोबाईल फोनचा वापर करत ज्येष्ठ पत्रकार रवीश कुमार यांचा एक व्हिडिओ दाखवला. या व्हिडिओच्या माध्यमातून त्यांनी महिला आरक्षणाबाबत केंद्र सरकारने केलेल्या दाव्यांची पोलखोल केली. संसदेत महिला आरक्षण विधेयक आणताना 2026 पर्यंत त्यावर कशी स्थगिती (Freeze) आणली गेली आहे आणि त्यामागील तांत्रिक कारणे काय आहेत, हे त्यांनी उपस्थितांना समजावून सांगितले. भाजपच्या वरिष्ठ नेत्यांनी संसदेत यापूर्वी काय भूमिका मांडली होती आणि आता ते काय बोलत आहेत, यातील विरोधाभास त्यांनी पुराव्यासह जनतेसमोर मांडला.
शिवसैनिकांना ‘वाघासारखे’ जगण्याचे आवाहन
भाषणाच्या शेवटी त्यांनी शिवसैनिकांमध्ये जोश भरताना छत्रपती शिवाजी महाराजांच्या इतिहासाची आठवण करून दिली. “100 दिवस शेळीसारखे जगण्यापेक्षा एक दिवस वाघासारखे जगा,” या शिवसेनाप्रमुखांच्या वाक्याचा पुनरुच्चार करत त्यांनी अन्यायाविरुद्ध लढण्याचे आवाहन केले. महाराष्ट्राने नेहमीच देशाला दिशा दाखवली आहे आणि आताही मराठी माणसाला अन्यायाविरुद्ध उभे राहावे लागेल, असे ते म्हणाले. तपास यंत्रणांचा ससेमिरा मागे लावून छळ करणाऱ्यांना धडा शिकवण्यासाठी सर्व कामगारांनी आणि शिवसैनिकांनी सज्ज राहावे, असे आवाहन त्यांनी केले.
