Naxals Surrender In Bastar: छत्तीसगडच्या बस्तर विभागातून माओवादी विरोधातील लढ्यात मोठे यश समोर आले आहे. पोलिसांच्या माहितीनुसार, एकूण 51 माओवाद्यांनी हिंसेचा मार्ग सोडून आत्मसमर्पण केले आहे. विशेष म्हणजे, या सर्व माओवाद्यांवर मिळून एकूण 1.61 कोटी रुपयांचे बक्षीस जाहीर करण्यात आले होते. राष्ट्रपती द्रौपदी मुर्मू यांनी जगदलपूर येथे "बस्तर पांडम 2026" महोत्सवाचे उद्घाटन केले आणि केंद्रीय गृहमंत्री अमित शहा रायपूर दौऱ्यावर असताना हे सामूहिक आत्मसमर्पण पार पडले. यामध्ये 34 महिला माओवाद्यांचा समावेश आहे.
पूना मार्गेम उपक्रमाचा प्रभाव
बस्तरचे पोलीस महानिरीक्षक सुंदरराज पट्टीलिंगम यांनी सांगितले की, बस्तर पोलिसांच्या "पूना मार्गेम पुनर्वसन उपक्रम" आणि राज्य सरकारच्या धोरणांमुळे माओवादी मोठ्या प्रमाणावर मुख्य प्रवाहात सामील होत आहेत. यामध्ये विजापूर जिल्ह्यात 20 महिलांसह 30 माओवाद्यांनी, तर शेजारच्या सुकमा जिल्ह्यात 14 महिलांसह 21 माओवाद्यांनी आत्मसमर्पण केले. विकासाची कामे आणि पुनर्वसन धोरणामुळे प्रभावित होऊन माओवाद्यांनी शस्त्रे खाली ठेवली आहेत.
हेही वाचा – Agni-3 Missile : शत्रूची आता खैर नाही! भारताने केली 'अग्नि-3' क्षेपणास्त्राची यशस्वी चाचणी
गरियाबंदमध्ये शस्त्रास्त्रांचा मोठा साठा जप्त
एकीकडे माओवादी शरण येत असतानाच, दुसऱ्या बाजूला सुरक्षा दलांनी गरियाबंद जिल्ह्यात माओवाद्यांच्या तळांवर मोठी कारवाई केली आहे. ओडिशा सीमेला लागून असलेल्या मैनपूर पोलीस स्टेशन अंतर्गत भालुदिघी आणि मेटल हिल्समध्ये सलग 36 तास चाललेल्या या मोहिमेत नक्षलवाद्यांनी लपवून ठेवलेला मोठा दारूगोळा जप्त करण्यात आला. सुरक्षा दलांनी डोंगराळ भागातील 6 वेगवेगळ्या ठिकाणांहून शस्त्रे आणि शस्त्रे बनवण्याचे साहित्य हस्तगत केले आहे.
जप्त केलेल्या शस्त्रांची मोठी यादी
या महिन्याच्या सुरुवातीला आत्मसमर्पण केलेल्या माओवाद्यांनी दिलेल्या माहितीनुसार, विशेष E-30 युनिटने ही कारवाई केली. जप्त केलेल्या वस्तूंमध्ये 2 इन्सास रायफल, 1 .303 रायफल, 1 देशी बनावटीचे पिस्तूल, 1 बॅरल ग्रेनेड लाँचर, 2 12-बोअर बंदुका, 2 'सिंगल-शॉट' शस्त्रे, 127 काडतुसे, 8 मॅगझिन आणि 22 बीजीएल शेल यांचा समावेश आहे. ही शस्त्रास्त्र कार्यशाळा गेल्या वर्षी चकमकीत मारल्या गेलेल्या 3 केंद्रीय समिती सदस्यांच्या देखरेखीखाली चालवली जात होती, अशी माहितीही समोर आली आहे.
