Mallikarjun Kharge: लोकसभेत मंजुरी मिळाल्यानंतर, परीक्षांमधील गैरप्रकारांना आळा घालण्याच्या उद्देशाने आणलेले 'सार्वजनिक परीक्षा सुधारणा विधेयक, 2026' गुरुवारी राज्यसभेत मांडण्यात आले. या विधेयकावरील चर्चेदरम्यान विरोधी पक्षनेते मल्लिकार्जुन खर्गे यांनी केंद्र सरकारवर अत्यंत बोचरी टीका केली. पेपर लीकच्या समस्येवर ठोस उपाय शोधण्याऐवजी, रस्त्यावर उतरलेल्या तरुण आणि विद्यार्थ्यांचा वाढता असंतोष शांत करण्यासाठीच सरकारने हे जुन्याच नियमांचे नवे विधेयक आणल्याचा गंभीर आरोप त्यांनी केला.
जंतर-मंतरवरील लाठीचारावरून अमित शाह आणि मोदी सरकारवर टीका
जंतर-मंतर येथे शांततेच्या मार्गाने संसदेकडे जाणाऱ्या विद्यार्थ्यांवर झालेल्या लाठीमार, अश्रूधूर आणि पॅलेट गनच्या वापरावरून खर्गे यांनी गृहमंत्री अमित शाह आणि पंतप्रधान नरेंद्र मोदी यांना धारेवर धरले. संवादाची अपेक्षा घेऊन आलेल्या हजारो विद्यार्थ्यांना रोखण्यासाठी मेट्रो, रेल्वे स्थानके आणि इंटरनेट बंद करण्यात आले. बिहारमध्ये AK-47 च्या वापराचा उल्लेख करत, इतकी मोठी घटना घडल्यानंतरही गृहमंत्री सभागृहात गप्प का आहेत आणि पंतप्रधान या मुद्द्यावर भाष्य का करत नाहीत, असा सवाल करत त्यांनी या कारवाईचे आदेश कोणी दिले, याचे उत्तर देण्याची मागणी केली.
विधेयकात जुन्याच गोष्टी; परीक्षा पद्धतीत मूळ सुधारणांची गरज
खर्गे म्हणाले की, 2024 मध्येच विरोधी पक्षाने याविरोधात कठोर कायद्याची मागणी केली होती, जी सरकारने फेटाळून लावली होती. आता आणलेल्या विधेयकात मोठे दंड, कठोर शिक्षा, फास्ट ट्रॅक कोर्ट आणि विशेष कृती दलाच्या केवळ बाता आहेत. जोपर्यंत परीक्षा घेण्याच्या संपूर्ण प्रक्रियेत आणि पद्धतीत आमूलाग्र बदल केला जात नाही, तोपर्यंत केवळ नावे बदलून किंवा जुनेच कायदे पुन्हा मांडून काहीही साध्य होणार नाही.
पंतप्रधान मोदींनी संसदेत येऊन स्पष्टीकरण द्यावे; नड्डा यांच्याशी खडाजंगी
राहुल गांधी यांच्यासह संपूर्ण विरोधी पक्ष 2024 पासून विद्यार्थ्यांच्या चिंतेचा मुद्दा उपस्थित करत असल्याचे सांगत, पंतप्रधान मोदींनी स्वतः संसदेत येऊन यावर अधिकृत निवेदन दिले पाहिजे, अशी आग्रही मागणी खर्गे यांनी केली. तसेच शिक्षणमंत्री म्हणून पुन्हा नियुक्ती झाल्यानंतर धर्मेंद्र प्रधान यांचे स्वागत करण्याच्या औचित्यावरही त्यांनी प्रश्न उपस्थित केला. दरम्यान, या भाषणापूर्वी 'नीट' (NEET) परीक्षेच्या निदर्शनांवरून खर्गे आणि भाजप अध्यक्ष जे.पी. नड्डा यांच्यात तीव्र खडाजंगी झाली; ज्यावर कायदा व सुव्यवस्था राखणे हे पोलिसांचे काम असल्याचे सांगत केंद्रीय मंत्र्यांनी सरकारची बाजू सावरण्याचा प्रयत्न केला.
