Delhi Airport ATC glitch : दिल्लीच्या इंदिरा गांधी आंतरराष्ट्रीय विमानतळावर (IGI Airport) शुक्रवारी हवाई वाहतूक नियंत्रण यंत्रणेत (एटीसी – ATC) तांत्रिक अडथळा (Technical Glitch) निर्माण झाल्यामुळे प्रवाशांचे मोठे हाल झाले. या तांत्रिक समस्येमुळे 800 हून अधिक देशांतर्गत (Domestic) तसेच आंतरराष्ट्रीय (International) विमानांना उशीर झाल्याची माहिती सूत्रांनी दिली आहे. या समस्येचा फटका सर्व विमान कंपन्यांना आणि त्यांच्या प्रवाशांना बसला.
नेमका बिघाड कशात झाला?
हा तांत्रिक अडथळा 'एटीसी डेटाला सहाय्य करणाऱ्या ऑटोमॅटिक मेसेज स्विचिंग सिस्टम' (AMSS) मध्ये उद्भवला होता. या बिघाडामुळे दिवसभरात दिल्ली विमानतळावरून होणारी किमान 20 विमान उड्डाणे रद्द (Cancelled) करण्यात आली. इंडिगो, एअर इंडिया, एअर इंडिया एक्स्प्रेस, स्पाइसजेट आणि आकासा एअर यांसारख्या प्रमुख कंपन्यांच्या विमानांना उशीर झाल्यामुळे प्रवाशांना विमानतळावर ताटकळत राहावे लागले.
वर्दळीचे विमानतळ: इंदिरा गांधी आंतरराष्ट्रीय विमानतळ हे देशातील सर्वात वर्दळीचे विमानतळ आहे, जिथे दिवसभरात 1,500 हून अधिक विमाने उड्डाण करतात आणि उतरतात.
समस्या सोडवण्यात यश, पण सेवा पूर्ववत होण्यास विलंब
संध्याकाळच्या सुमारास 'एएमएसएस'ची समस्या सोडवण्यात यश आल्याची माहिती विमानतळ प्राधिकरणाने (एएआय – AAI) दिली. ही तांत्रिक समस्या दूर करण्यासाठी इलेक्ट्रॉनिक्स कॉर्पोरेशन ऑफ इंडिया लिमिटेडचे अधिकारी हैदराबादहून दिल्लीला तातडीने पोहोचले होते.
सेवा सुरळीत होण्यास वेळ: 'एएआय'ने सांगितले की, समस्या सोडवण्यात आली असली तरी सेवा सुरळीत होण्यास काहीसा वेळ लागेल. या तांत्रिक समस्येचे नेमके कारण शोधण्यासाठी चौकशी केली जाईल, असेही सूत्रांनी सांगितले.
अमेरिकेतील 'शटडाऊन'चा विमान सेवेवर परिणाम
दरम्यान, अमेरिकेतील विमानसेवेवरही विपरित परिणाम झाला आहे. वॉशिंग्टनमध्ये फेडरल हवाई प्रशासनाने (FAA) देशभरातील विमानांच्या उड्डाणांमध्ये कपात करण्याचे आदेश दिले आहेत. अमेरिकेतील 'शटडाऊन' (Shutdown) अजूनही सुरू असून त्याने विक्रमी कालावधी गाठला आहे. अधिकाऱ्यांनी दिलेल्या माहितीनुसार, देशभरात शेकडो विमाने रद्द करण्यात आली. विमान कंपन्यांना गुरुवारीच 'एफएए'च्या या आदेशाची कल्पना देण्यात आली होती, त्यानुसार त्यांनी विमानांच्या वेळा बदलण्यास आणि काही विमाने रद्द करण्यास सुरुवात केली होती.
हेही वाचा – Cyber Fraud: तृणमूल खासदार कल्याण बॅनर्जींच्या खात्यातून 55 लाखांची सायबर चोरी! बनावट KYC करून लुटलं
