Sushma Andhare on Prajakta Mali : मराठी मनोरंजन विश्वातील लोकप्रिय अभिनेत्री प्राजक्ता माळीवर सरकारच्या विरोधकांकडून सध्या जोरदार टीका होत आहे. तिच्या एका राजकीय विधानामुळे हा नवा वाद सुरू झाला आहे. मुंबईतील दादर येथे आयोजित ‘नारी शक्ती वंदन’ महिला संमेलनात प्राजक्ताने मुख्यमंत्री देवेंद्र फडणवीस यांच्यावर कौतुकाचा वर्षाव केला. ‘महिलांचा सन्मान कसा करावा, त्यांना आदर कसा द्यावा, कसं वागावं यांचं मूर्तीमंत उदाहरण म्हणजे मुख्यमंत्री देवेंद्र फडणवीस. जिथं कठोर व्हायला पाहिजे तिथं ते बापाप्रमाणे कठोर होतात, जिथं आईचं ममत्व पाहिजे तिथं त्या पद्धतीने तशा गोष्टी हाताळतात,’ अशा शब्दांत तिने मुख्यमंत्र्यांच्या कार्यशैलीचे समर्थन केले. मात्र, या विधानानंतर शिवसेना (UBT) नेत्या सुषमा अंधारे यांनी प्राजक्ताचा समाचार घेत तिच्यावर जोरदार टीका केली आहे.
मुख्यमंत्र्यांच्या संयमी वाणीचे प्राजक्ताकडून कौतुक
कार्यक्रमात बोलताना प्राजक्ताने केवळ मुख्यमंत्र्यांच्या निर्णयांचेच नव्हे, तर त्यांच्या व्यक्तिमत्त्वाचेही कौतुक केले. ती म्हणाली की, टीव्हीवर किंवा जाहीर सभांमध्ये बोलताना मुख्यमंत्र्यांवर कितीही चिखलफेक झाली किंवा त्यांना ट्रोल केले गेले, तरी त्यांच्या वाणीतून कधीही चुकीचा शब्द बाहेर पडत नाही. “त्यांचा सूर कधीही ढळलेला मी पाहिला नाही,” असे म्हणत तिने फडणवीस यांच्याकडून महिलांचा सन्मान कसा राखायचा हे सर्वांनी शिकावे, असा सल्लाही दिला. यावेळी मंचावर बॉलिवूड अभिनेत्री रवीना टंडन यांचीही उपस्थिती होती.
हेही वाचा – Raju Patil : ‘माजी आमदार-खासदारांची पेन्शन बंद करा’; मनसे नेते राजू पाटील यांची मागणी
“हास्यजत्रेतील स्कीटपेक्षाही हास्यास्पद”; अंधारेंची सडकून टीका
प्राजक्ता माळीच्या या स्तुतिसुमनांवर सुषमा अंधारे यांनी सोशल मीडियाच्या माध्यमातून अत्यंत जोरदार प्रतिक्रिया दिली आहे. अंधारे यांनी आपल्या पोस्टमध्ये म्हटले की, ‘प्राजक्ताजी, तुम्ही हास्यजत्रेच्या निवेदिका आहात आणि तो कार्यक्रम आम्ही आवडीने पाहतो. परंतु, राज्यातील महिलांच्या लैंगिक शोषणाच्या प्रश्नांवर जेव्हा तुम्ही मौन बाळगता आणि अचानक मुख्यमंत्र्यांच्या ब्रँडिंगवर बोलू लागता, तेव्हा ते एखाद्या विनोदी स्कीटपेक्षाही अधिक हास्यास्पद वाटते,’ असे अंधारे यांनी एक्स पोस्टद्वारे म्हटले आहे.
प्राजक्ताजी तुम्ही हास्य जत्रेच्या निवेदिका आहात आणि हा कार्यक्रम आम्ही आवडीने बघतो.
पण राज्यातल्या एकूण महिला लैंगिक शोषणाच्या एकाही प्रश्नावर ब्र शब्द न करणाऱ्या तुम्ही मुख्यमंत्र्यांच्या ब्रँडिंग वर बोलायला लागलात तर हास्यजत्रे मधल्या स्कीट पेक्षा सुद्धा ते जास्त… pic.twitter.com/kWAjeYkDYm — SushmaTai Andhare (@andharesushama) April 16, 2026
कला आणि राजकारण यातील संघर्षाची चर्चा
प्राजक्ता माळी ही केवळ अभिनेत्री नसून एक यशस्वी उद्योजिका आणि निवेदिका म्हणूनही ओळखली जाते. तिचे स्पष्टवक्तेपण अनेकदा चर्चेचा विषय ठरते, मात्र यावेळी तिने थेट राजकीय बाजू घेतल्याने नेटकऱ्यांमध्ये दोन गट पडले आहेत. एकीकडे मुख्यमंत्र्यांच्या समर्थकांनी प्राजक्ताचे कौतुक केले आहे, तर दुसरीकडे विरोधकांनी तिला कलाकार म्हणून सामाजिक प्रश्नांवर बोलण्याचे आवाहन केले आहे. या वादामुळे मनोरंजन क्षेत्रातील कलाकारांनी राजकीय व्यासपीठावर आपली मते मांडावीत की नाही, यावर पुन्हा एकदा नवीन चर्चा रंगू लागली आहे.
