Suryakumar Yadav: भारतीय क्रिकेट संघाने रविवार, 8 मार्च 2026 रोजी न्यूझीलंडचा 96 धावांनी धुव्वा उडवत तिसऱ्यांदा टी-20 विश्वचषक जिंकून इतिहास रचला आहे. एम.एस. धोनी आणि रोहित शर्मा यांच्यानंतर हा किताब जिंकणारा सूर्यकुमार यादव हा तिसरा भारतीय कर्णधार ठरला आहे. मात्र, या ऐतिहासिक विजयानंतरही कर्णधार सूर्याचे समाधान झालेले नाही. त्याने पत्रकार परिषदेत एक मोठी घोषणा करत भारतीय संघाचे पुढील ध्येय 'ऑलिम्पिक सुवर्णपदक' असल्याचे जाहीर केले आहे.
विजयाची हॅट्ट्रिक आणि आयसीसी ट्रॉफींचा दुष्काळ संपला
भारतीय क्रिकेटसाठी गेल्या 3 वर्षांचा काळ सुवर्णकाळ ठरला आहे. 2013 नंतर सुरू झालेला आयसीसी ट्रॉफींचा दुष्काळ आता पूर्णपणे संपला आहे. 2024 मध्ये रोहित शर्माच्या नेतृत्वाखाली भारताने दक्षिण आफ्रिकेला हरवून टी-20 विश्वचषक जिंकला. त्यानंतर 2025 मध्ये चॅम्पियन्स ट्रॉफीच्या अंतिम सामन्यात न्यूझीलंडचा पराभव केला आणि आता 2026 मध्ये सूर्यकुमार यादवच्या नेतृत्वाखाली भारताने पुन्हा एकदा टी-20 विश्वचषकावर आपले नाव कोरले आहे. सलग 3 वर्षे 3 मोठ्या आयसीसी ट्रॉफी जिंकून टीम इंडियाने जागतिक क्रिकेटवर आपले वर्चस्व सिद्ध केले आहे.
लक्ष आता 2028 च्या लॉस एंजेलिस ऑलिम्पिकवर
पत्रकार परिषदेत बोलताना सूर्यकुमार यादव म्हणाला, "हा विश्वचषक विजय खूप खास आहे, पण आमचे सर्वात मोठे ध्येय आता ऑलिम्पिक सुवर्णपदक जिंकणे हे आहे." क्रिकेटचा समावेश 128 वर्षांनंतर, म्हणजेच 2028 च्या लॉस एंजेलिस ऑलिम्पिकमध्ये होणार आहे. ऑलिम्पिकमध्ये भारताचा तिरंगा फडकवणे आणि सुवर्णपदकावर नाव कोरणे हे या संघाचे पुढील मुख्य उद्दिष्ट असल्याचे सूर्याने स्पष्ट केले. याशिवाय त्याच वर्षी होणारा टी-20 विश्वचषक जिंकण्याचे आव्हानही संघासमोर असणार आहे.
2027 चा एकदिवसीय विश्वचषक
भारतीय संघाचा आक्रमक दृष्टिकोन आता इतर संघांसाठी डोकेदुखी ठरत आहे. टी-20 मधील या यशानंतर आता टीम इंडियाची नजर 2027 च्या एकदिवसीय विश्वचषकावर (ODI World Cup) असणार आहे. हा विश्वचषक दक्षिण आफ्रिका, झिम्बाब्वे आणि नामिबियामध्ये खेळवला जाणार आहे. सूर्यकुमारच्या नेतृत्वाखालील ही तरुण ब्रिगेड ज्या पद्धतीने कामगिरी करत आहे, ते पाहता भारतीय क्रिकेटमध्ये आता नव्या युगाची सुरुवात झाली आहे, असे म्हणायला हरकत नाही.
