Donald Trump Warning: अमेरिकेचे राष्ट्राध्यक्ष डोनाल्ड ट्रम्प यांनी मध्यपूर्वेतील शांतता टिकवून ठेवण्यासाठी अत्यंत आक्रमक पाऊल उचलले आहे. 'ट्रुथ सोशल' या आपल्या सोशल मीडिया प्लॅटफॉर्मवर पोस्ट करत ट्रम्प यांनी इराण आणि इस्रायल या दोन्ही देशांना एकमेकांवरील क्षेपणास्त्र हल्ले आणि गोळीबार त्वरित थांबवण्याचे कडक निर्देश दिले आहेत. 7 जून 2026 रोजी समोर आलेल्या वृत्तानुसार, ट्रम्प यांनी इस्रायलचे पंतप्रधान बेंजामिन नेतान्याहू यांच्याशी फोनवर चर्चा करून इराणच्या हल्ल्यांना प्रत्युत्तर न देण्याचे आवाहन केले होते. गेल्या 3 महिन्यांपासून सुरू असलेला रक्तपात थांबवण्यासाठी सुरू असलेल्या शांतता कराराच्या वाटाघाटी इस्रायलच्या पलटवारामुळे धोक्यात येऊ नयेत, असा स्पष्ट युक्तिवाद ट्रम्प यांनी केला आहे.
इराणला चर्चेच्या टेबलावर आणण्याचे प्रयत्न
अमेरिकन प्रसारमाध्यम 'ॲक्सिओस'ने (Axios) दिलेल्या माहितीनुसार, रविवारी इराणने इस्रायलवर डागलेल्या क्षेपणास्त्रांनंतर दोन्ही देशांतील तणाव शिगेला पोहोचला आहे. हा तणाव शांतता प्रक्रियेत अडथळा ठरू नये, यासाठी ट्रम्प यांनी नेतान्याहू यांच्याशी सखोल चर्चा केली असून इराणलाही चर्चेच्या टेबलावर परतण्याचे आवाहन केले आहे. 'फॉक्स न्यूज' या वृत्तवाहिनीशी बोलताना ट्रम्प यांनी एक मोठी घोषणा केली की, अमेरिका आणि दोन्ही देश एका ऐतिहासिक शांतता कराराच्या अत्यंत जवळ पोहोचले आहेत. सोमवार, मंगळवार किंवा बुधवारपर्यंत या करारावर स्वाक्षरी होऊ शकते, असा विश्वास त्यांनी व्यक्त केला. इराणला इशारा देताना ते म्हणाले की, तुम्ही क्षेपणास्त्रे डागून तुमची ताकद दाखवली आहे, आता हे थांबवून तहाच्या वाटाघाटी पूर्ण करा.
प्रतिहल्ल्यांचे दुष्टचक्र थांबवण्याची गरज; इस्रायलच्या कारवाईवर नाराजी
इराणने केलेल्या ताज्या हल्ल्यांमुळे इस्रायलचे कोणतेही मोठे नुकसान झाले नसल्याचा दावा करत ट्रम्प यांनी नेतान्याहू यांनी संयम राखावा अशी अपेक्षा व्यक्त केली आहे. जर 'बिबी' (नेतान्याहू) यांनी पुन्हा प्रत्युत्तर दिले, तर अनेक दशकांपासून सुरू असलेले हे युद्धाचे दुष्टचक्र कधीच संपणार नाही, अशी भीती त्यांनी वर्तवली. 'फायनान्शियल टाइम्स'शी बोलताना ट्रम्प यांनी स्पष्ट केले की, अमेरिका आणि इराण यांच्यात होणारा कोणताही शांतता करार नेतान्याहू यांना स्वीकारावाच लागेल आणि त्यांच्याकडे दुसरा कोणताही पर्याय असणार नाही. दरम्यान, रविवारी इस्रायलने लेबनॉनची राजधानी बैरूतवर केलेल्या हवाई हल्ल्यांवर ट्रम्प यांनी तीव्र नाराजी व्यक्त केली असून आपण या कारवाईवर अजिबात खूश नसल्याचे म्हटले आहे. एका वरिष्ठ अमेरिकन अधिकाऱ्याच्या हवाल्याने समोर आले आहे की, शांतता करार अगदी अंतिम टप्प्यात असल्याने ट्रम्प यांनी नेतान्याहू यांना काही काळ लष्करी कारवाई थांबवण्यास सांगितले आहे.
