PM Modi Bhutan Visit: पंतप्रधान नरेंद्र मोदी दोन दिवसांच्या भूतान दौऱ्यासाठी रवाना झाले असून, ही भेट भारत-भूतान संबंधांसाठी अत्यंत महत्त्वाची मानली जात आहे. मोदी भूतानचे चौथे राजा जिग्मे सिंग्ये वांगचुक यांच्या 70 व्या जयंतीच्या कार्यक्रमात सहभागी होणार असून, या दरम्यान ते राजा जिग्मे खेसर नामग्याल वांगचुक, चौथे राजा आणि पंतप्रधान त्शेरिंग तोबगे यांच्यासोबत द्विपक्षीय चर्चाही करतील.
भूतान भेटीचे उद्दिष्ट
पंतप्रधान मोदींनी रवाना होण्यापूर्वी म्हटले की, “ही भेट भारत आणि भूतानमधील मैत्रीचे बंध अधिक मजबूत करेल आणि सामायिक प्रगतीसाठी नवी दिशा देईल.” त्यांनी सांगितले की, भूतानमध्ये जागतिक शांती प्रार्थना महोत्सवात भगवान बुद्धांच्या पिप्रहवा अवशेषांचे प्रदर्शन दोन्ही देशांतील आध्यात्मिक नात्याचे प्रतीक आहे.
पुनत्सांग्चु-II जलविद्युत प्रकल्पाचे उद्घाटन
या दौऱ्यादरम्यान पुनत्सांग्चु-II जलविद्युत प्रकल्पाचे उद्घाटन करण्यात येणार आहे. मोदींनी सांगितले की हा प्रकल्प भारत-भूतान ऊर्जा भागीदारीत एक नवा अध्याय उघडेल आणि दोन्ही देशांच्या आर्थिक सहकार्यास अधिक गती देईल. मोदी म्हणाले, “भारत आणि भूतानचे संबंध परस्पर विश्वास, सद्भावना आणि समजूतदारपणावर आधारित आहेत. ही भागीदारी ‘Neighbourhood First’ धोरणाचा मुख्य स्तंभ आहे आणि शेजाऱ्यांमधील आदर्श सहकार्याचे मॉडेल आहे.”
Leaving for Bhutan, where I will attend various programmes. This visit comes at a time when Bhutan is marking the 70th birthday of His Majesty the Fourth King. I will be holding talks with His Majesty the King of Bhutan, His Majesty the Fourth King and Prime Minister Tshering… — Narendra Modi (@narendramodi) November 11, 2025
भूतानसोबत सांस्कृतिक आणि धार्मिक नाते
भारत आणि भूतान दोघेही बौद्ध परंपरेच्या माध्यमातून एकमेकांशी जोडलेले आहेत. भूतानमधील यात्रेकरू दरवर्षी बोधगया, राजगीर, नालंदा, सारनाथ अशा बौद्ध तीर्थस्थळांना भेट देतात. याच आध्यात्मिक नात्याचा भाग म्हणून भारत सरकारने भूतानमध्ये भगवान बुद्धांच्या अवशेषांचे प्रदर्शन 8 ते 18 नोव्हेंबरदरम्यान आयोजित केले आहे. पंतप्रधान मोदींनी 2014 मध्ये पहिल्यांदा पदभार स्वीकारल्यानंतर पहिला परदेश दौरा भूतानलाच दिला होता. 2019 आणि 2024 मध्येही त्यांनी भूतानला भेट दिली. गेल्या वर्षीच्या भेटीदरम्यान भूतानच्या राजाकडून त्यांना देशाचा सर्वोच्च नागरी सन्मान ‘ऑर्डर ऑफ द ड्रुक ग्याल्पो’ मिळाला. हा सन्मान मिळवणारे ते पहिले परदेशी नेते ठरले. मोदींचा हा दौरा केवळ औपचारिक नाही, तर भारत-भूतान संबंधांना नव्या उंचीवर नेणारा ठरेल, असा विश्वास दोन्ही देशांनी व्यक्त केला आहे.
