Parinay Phuke on Sushma Andhare and Kunal Kamra : विधीमंडळ विशेष हक्कभंग समितीचे सदस्य परिणय फुके यांनी शिवसेना (ठाकरे गट) नेत्या सुषमा अंधारे आणि स्टँडअप कॉमेडियन कुणाल कामरा यांच्यावर कडक कारवाई होण्याचे संकेत दिले आहेत. विधीमंडळाचा आणि नेत्यांचा अपमान होईल अशी विधाने केल्याप्रकरणी या दोघांनाही समितीसमोर पाचारण करण्यात येणार होते. मात्र, काही कारणास्तव नियोजित बैठक पुढे ढकलण्यात आली असून, लवकरच नवीन तारखेला त्यांना त्यांचे म्हणणे मांडण्याची संधी दिली जाणार असल्याचे फुके यांनी स्पष्ट केले आहे.
अंधारे आणि कामरा यांना म्हणणे मांडण्याची संधी
परिणय फुके यांनी माध्यमांशी बोलताना सांगितले की, विधीमंडळाचा अवमान होईल असे वक्तव्य केल्याबद्दल सुषमा अंधारे आणि कुणाल कामरा यांच्याविरोधात तक्रारी आहेत. समितीचे अध्यक्ष दाडगे यांच्या अनुपस्थितीमुळे आजची बैठक रद्द करण्यात आली आहे. या दोघांनाही त्यांचे म्हणणे मांडण्याचा पूर्ण अधिकार असून समिती त्यांचे म्हणणे ऐकून घेईल. मात्र, जर विधाने चुकीची आणि सभागृहाची प्रतिष्ठा कमी करणारी आढळली, तर त्यांच्यावर निश्चितच कारवाई केली जाईल, असा इशारा फुके यांनी दिला आहे. याच आठवड्यात या संदर्भात पुन्हा बैठक घेऊन पुढील प्रक्रिया पूर्ण केली जाणार आहे.
हेही वाचा – Ambadas Danve: छत्रपती संभाजीनगरमध्ये राडा, अंबादास दानवेंनी भरचौकात भाजप नेत्याची कॉलर पकडली अन्…
अजित पवारांचा अपघात: वैमानिकाची चूक असल्याचे स्पष्ट
राष्ट्रवादी काँग्रेसचे नेते अजित पवार यांच्या हेलिकॉप्टर अपघाताच्या चौकशीबाबतही फुके यांनी महत्त्वपूर्ण माहिती दिली. या प्रकरणी आतापर्यंत 2 अहवाल प्राप्त झाले असून, दोन्ही अहवालांमध्ये हा अपघात वैमानिकाच्या (Pilot) चुकीमुळे झाल्याचे स्पष्ट नमूद करण्यात आले आहे. संजय राऊत यांनी केलेल्या आरोपांना उत्तर देताना फुके म्हणाले की, सरकार कोणालाही वाचवण्याचा प्रयत्न करत नाही. चौकशी अद्याप सुरू असून जर आणखी काही पुरावे समोर आले, तर इतर संबंधितांवरही कडक कारवाई केली जाईल. या प्रकरणात कोणतीही तडजोड केली जाणार नसल्याचे त्यांनी ठामपणे सांगितले.
इंधन आणि गॅस तुटवड्यावर सरकारचे स्पष्टीकरण
देशात आणि राज्यात पेट्रोल, डिझेल तसेच गॅसचा तुटवडा निर्माण होऊ नये यासाठी राज्य आणि केंद्र सरकार पूर्णपणे लक्ष देऊन आहे. रशिया आणि इतर देशांकडून गॅस आणि इंधन खरेदी करण्याची प्रक्रिया सुरू असल्याचे फुके यांनी सांगितले. सध्या इंधन कंपन्यांकडे पुरेसा साठा उपलब्ध असून नागरिकांनी घाबरून जाण्याची किंवा पॅनिक (Panic) होण्याची कोणतीही गरज नाही. काळाबाजार रोखण्यासाठी सरकार कडक पावले उचलत असून पर्यायी मार्गांनी पुरवठा सुरळीत ठेवण्याचे प्रयत्न सुरू आहेत, असेही त्यांनी नमूद केले. तसेच, फुके यांनी विरोधकांवर कडाडून टीका केली. महाविकास आघाडीतील तिन्ही पक्षांमध्ये आपापसात मोठे मतभेद असून ते आपापल्या भांडणातच व्यस्त आहेत. उद्धव ठाकरे यांची शिवसेना आता पूर्णपणे काँग्रेसवर अवलंबून असून राहुल गांधी यांचे कौतुक केल्याशिवाय त्यांच्याकडे पर्याय उरलेला नाही, असेही फुके यांनी आपल्या प्रतिक्रियेत म्हटले आहे.
