Divyang Sahayak Portal: राज्यातील दिव्यांग बांधवांसाठी शिंदे-फडणवीस-पवार सरकारने एक अत्यंत महत्त्वपूर्ण आणि मोठा निर्णय घेतला आहे. दिव्यांग नागरिकांना शासकीय योजना आणि सेवांचा लाभ मिळवण्यात येणाऱ्या अडचणी दूर करण्यासाठी शासनाने आता सर्व योजना ‘एका क्लिकवर’ उपलब्ध करून दिल्या आहेत. यासाठी राज्य सरकारकडून विशेष ‘दिव्यांग सहाय्यक पोर्टल’ (Divyang Sahayak Portal) सुरू करण्यात आले आहे. राज्याचे दिव्यांग कल्याण मंत्री अतुल सावे यांनी या संदर्भातील अधिकृत घोषणा केली असून, या डिजिटल सुविधेमुळे दिव्यांग बांधवांना आता विविध कार्यालयांचे उंबरठे झिजवण्याची गरज भासणार नाही.
हेही वाचा – Jayant Patil: ‘राज्यात गुन्हेगारीचा सुळसुळाट, कायदा-सुव्यवस्था धोक्यात…’; जयंत पाटलांचा सरकारवर थेट निशाणा
काय आहे ‘दिव्यांग सहाय्यक पोर्टल’? मंत्री अतुल सावे यांनी दिली माहिती
या ऐतिहासिक निर्णयाबद्दल माहिती देताना दिव्यांग कल्याण मंत्री अतुल सावे म्हणाले की, “महाराष्ट्रातील दिव्यांग नागरिकांना शासकीय योजना आणि सेवांचा लाभ एकाच ठिकाणी मिळवून देण्यासाठी शासनाने हे पाऊल उचलले आहे. याद्वारे दिव्यांगांचे सक्षमीकरण करणे आणि सर्व योजना एकाच डिजिटल व्यासपीठावर (Single Platform) उपलब्ध करून देणे हा शासनाचा मुख्य उद्देश आहे.” या एकाच पोर्टलवर शासनाच्या विविध योजना, त्यासाठी लागणारी पात्रता, आवश्यक कागदपत्रे आणि ऑनलाईन अर्ज करण्याची थेट सुविधा उपलब्ध करून देण्यात आली आहे.
लाभार्थ्यांना मिळणार ‘या’ विशेष सुविधा; अर्जाची स्थितीही ट्रॅक करता येणार
या नवीन पोर्टलचे सर्वात मोठे वैशिष्ट्य म्हणजे, लाभार्थ्यांना त्यांच्या पात्रतेनुसार कोणत्या योजना लागू होतात, याची माहिती या व्यासपीठावर आपोआप (Automatically) मिळणार आहे. त्यामुळे योग्य योजनेचा शोध घेणे अधिक सोपे होईल. याशिवाय, अर्ज केल्यानंतर आपल्या अर्जाची सद्यस्थिती (Application Status) काय आहे, हे देखील दिव्यांगांना ऑनलाईन पाहता येणार आहे. या संपूर्ण पारदर्शक आणि गतिमान डिजिटल सुविधेमुळे दिव्यांग लाभार्थ्यांचा वेळ आणि श्रम दोन्ही वाचणार असून, योजना थेट त्यांच्यापर्यंत पोहोचण्यास मोठी मदत होणार आहे.
