Mumbai traffic advisory : भारत आणि इंग्लंड यांच्यात होणाऱ्या थरारक टी-20 (T20) विश्वचषक उपांत्य फेरीच्या सामन्यासाठी मुंबई सज्ज झाली आहे. वानखेडे स्टेडियमवर गुरुवारी होणाऱ्या या महामुकाबल्यापूर्वी मुंबई ट्रॅफिक पोलिसांनी मरीन ड्राइव्ह आणि दक्षिण मुंबई परिसरात मोठ्या वाहतूक कोंडीची शक्यता वर्तवली आहे. पोलिसांनी 'एक्स' (पूर्वीचे ट्विटर) द्वारे प्रवाशांना सावध केले असून, गैरसोय टाळण्यासाठी पर्यायी मार्गांचा वापर करण्याचे आणि प्रवासाचे नियोजन आधीच करण्याचे आवाहन केले आहे. हा सामना संध्याकाळी 7 वाजता सुरू होणार असून, प्रेक्षकांसाठी स्टेडियमचे प्रवेशद्वार दुपारी 4 वाजल्यापासून खुले करण्यात येणार आहेत.
सार्वजनिक वाहतुकीचा वापर करण्याचे आवाहन
वानखेडे स्टेडियमवर प्रेक्षकांची होणारी प्रचंड गर्दी लक्षात घेता, प्रशासनाने खासगी वाहनांऐवजी सार्वजनिक वाहतुकीचा वापर करण्याचा सल्ला दिला आहे. स्टेडियमवर पोहोचण्यासाठी प्रवाशांना खालील पर्यायांचा वापर करता येईल:
पश्चिम रेल्वे: प्रेक्षक चर्चगेट रेल्वे स्टेशन किंवा मरीन लाइन्स रेल्वे स्टेशनचा वापर करू शकतात.
मुंबई मेट्रो: मेट्रो लाईन 3 (अॅक्वा लाईन) द्वारे चर्चगेट मेट्रो स्टेशनवर उतरून स्टेडियमकडे जाता येईल.
पादचारी पूल (FOB): गर्दीचे नियंत्रण करण्यासाठी प्राप्त तिकीट गेटनुसार विशिष्ट पादचारी पुलांचा वापर करण्याच्या सूचना देण्यात आल्या आहेत.
प्रवेशद्वारानुसार निश्चित केलेले मार्ग
तुमच्याकडे कोणत्या गेटचे तिकीट आहे, त्यानुसार पोलिसांनी खालील मार्ग सुचवले आहेत:
गेट 1 आणि 7: या प्रेक्षकांनी चर्चगेट रेल्वे किंवा मेट्रो स्टेशनवरून उतरून 'E' रोडने स्टेडियमकडे जावे.
गेट 3 आणि 4: मरीन लाइन्स रेल्वे स्टेशनचा वापर करून महर्षी कर्वे रोडवरील 'रूपकला शोरूम' जवळील पादचारी पुलावरून (FOB) प्रवेश करावा.
गेट 5 आणि 6: चर्चगेट स्टेशनवरून उतरून इन्कम टॅक्स ऑफिससमोरील महर्षी कर्वे रोडवर असलेल्या पादचारी पुलाचा वापर करून स्टेडियम गाठावे.
सेमीफायनलमधील चुरस आणि टीम इंडियाची तयारी
भारतीय संघाने या स्पर्धेत 7 पैकी 6 सामने जिंकून दिमाखात उपांत्य फेरीत प्रवेश केला आहे. सुपर 8 मध्ये दक्षिण आफ्रिकेविरुद्ध झालेला 76 धावांचा पराभव हा एकमेव अडथळा ठरला होता. आता सलग तिसऱ्यांदा उपांत्य फेरीत भारताचा सामना गतविजेत्या इंग्लंडशी होत आहे. या महत्त्वाच्या सामन्यापूर्वी अक्षर पटेल, इशान किशन आणि अभिषेक शर्मा आदी खेळाडूंनी सिद्धिविनायक मंदिरात जाऊन बाप्पाचे आशीर्वाद घेतले. जो संघ हा सामना जिंकेल, त्याचा रविवारी होणाऱ्या फायनलमध्ये न्यूझीलंडशी मुकाबला होईल. इंग्लंडचा संघ सलग दुसऱ्यांदा विश्वविजेतेपद राखण्याच्या इराद्याने मैदानात उतरणार आहे.
