High Court Denied Bail to Ramesh Mhatre: डोंबिवलीतील शास्त्रीनगर शासकीय रुग्णालयात वैद्यकीय अधिकारी आणि कर्मचाऱ्यांना अमानुष मारहाण केल्याप्रकरणी वादाच्या भोवऱ्यात सापडलेले शिवसेना शिंदे गटाचा नगरसेवक रमेश म्हात्रे याला मुंबई उच्च न्यायालयाने पुन्हा एकदा मोठा दणका दिला आहे. तात्काळ जामीन मिळवण्यासाठी रमेश म्हात्रे याने न्यायालयात धाव घेतली होती, मात्र उच्च न्यायालयाने त्याला दिलासा देण्यास स्पष्ट नकार दिला. ‘आधी डॉक्टरांवर हल्ला करायचा आणि नंतर आजारपणाचे किंवा वयाचे कारण दाखवून जामीनाची मागणी करायची,’ अशा दुटप्पी भूमिकेवर न्यायालयाने तीव्र नाराजी व्यक्त केली. या प्रकरणाची पुढील सुनावणी तहकूब करण्यात आली असून तोपर्यंत म्हात्रे याचा ताबा न्यायालयीन कोठडीतच राहणार आहे.
‘मतदारांची डोकी फोडता का?’ न्यायालयाचा जळजळीत सवाल
सुनावणीदरम्यान मुंबई उच्च न्यायालयाच्या पीठाने लोकप्रतिनिधींच्या या हिंसक वर्तनावर कडक शब्दांत ताशेरे ओढले. ‘तुम्ही जनतेकडे जाता तेव्हा त्यांची सेवा करण्याचे वचन देऊन मते मागता आणि निवडून आल्यावर खुर्च्या-फाइल्स फेकून डॉक्टरांची डोकी फोडता का?’ असा थेट सवाल न्यायालयाने केला. मारहाणीच्या व्हायरल व्हिडिओचा उल्लेख करत प्रभारी सरन्यायाधीशांच्या खंडपीठाने म्हात्रे याच्या वकिलांना विचारले की, ‘मारहाण करताना म्हात्रे कुठेही 73 वर्षांचे वृद्ध वाटत नाहीत; टेबलवरून उड्या मारून ते 25 वर्षांच्या तरुणासारख्या ताकदीने डॉक्टरांवर तुटून पडत होते.’ याशिवाय, निष्पक्ष तपासासाठी या प्रकरणाचा तपास पोलीस उपायुक्त (DCP) दर्जाच्या अधिकाऱ्याकडे सोपवण्याचे स्पष्ट आदेश उच्च न्यायालयाने पोलिसांना दिले आहेत.
CCTV मध्ये कैद झाली अमानुष मारहाण; डोंबिवलीत तीव्र संताप
शास्त्रीनगर रुग्णालयात एका महिला डॉक्टर, परिचारिका आणि वैद्यकीय कर्मचाऱ्यांना म्हात्रे व त्यांच्या सहकाऱ्यांनी अर्ध्या सेकंदाचाही वेळ न दवडता सातत्याने मारहाण केली होती. या घटनेचे संपूर्ण चित्रीकरण तेथील CCTV कॅमेऱ्यात कैद झाले आणि त्याचा व्हिडिओ सोशल मीडियावर प्रचंड व्हायरल झाला. या घटनेनंतर संपूर्ण वैद्यकीय क्षेत्रासह राजकीय वर्तुळातून संतापाची लाट उसळली होती. विष्णुनगर पोलिसांनी सुरुवातीला म्हात्रे याच्या तीन सहकाऱ्यांना अटक केली होती, परंतु वाढता विरोध आणि विरोधकांच्या आक्रमक पवित्र्यानंतर अखेर रमेश म्हात्रे यालाही पोलिसांनी बेड्या ठोकल्या.
‘बाहुबली’ म्हात्रेचा गुन्हेगारी भूतकाळ आणि डॉक्टरांचे जुने उपकार
अटक झाल्यानंतर म्हात्रे याच्या गुन्हेगारी पार्श्वभूमीची पुन्हा एकदा जोरदार चर्चा सुरू झाली आहे. हत्येचा प्रयत्न आणि अपहरणासारखे अत्यंत गंभीर गुन्हे दाखल असलेल्या म्हात्रे याच्यावर 2008 मध्ये प्राणघातक गोळीबार झाला होता. त्यावेळी शर्टच्या खिशातील पेनाने गोळीचा वेग मंदावला, तरीही ती पोटात घुसल्याने ते गंभीर जखमी झाले होते. तेव्हा डोंबिवलीतील एका खासगी रुग्णालयातील डॉ. मिलिंद शिरोडकर यांनी तातडीने शस्त्रक्रिया करून त्यांचे प्राण वाचवले होते. त्याआधीही एका हल्ल्यात म्हात्रे यांची किडनी निकामी झाली असताना, याच डॉक्टरांनी शस्त्रक्रिया करून त्यांना मृत्यूच्या दाढेतून बाहेर काढले होते. ज्या वैद्यकीय क्षेत्राने दोनदा म्हात्रे यांना जीवनदान दिले, त्याच वैद्यकीय क्षेत्रातील डॉक्टरांवर आणि महिला कर्मचाऱ्यांवर म्हात्रे यांनी हात उचलल्याने नागरिकांमधून तीव्र संताप व्यक्त होत आहे.
कल्याण न्यायालयाचा जामीन रद्द; 3 ऑगस्टपर्यंत न्यायालयीन कोठडी
यापूर्वी कल्याण न्यायालयाने रमेश म्हात्रे व इतर आरोपींना दिलेला जामीन उच्च न्यायालयाने रद्द करत त्याला तात्काळ आत्मसमर्पण करण्याचे आदेश दिले होते. त्यानुसार म्हात्रे याने पोलिसांत शरणागती पत्करल्यानंतर न्यायालयाने त्यांना 3 ऑगस्टपर्यंत न्यायालयीन कोठडी सुनावली आहे. मारहाणीचा व्हिडिओ आणि गुन्हेगारी इतिहास पाहता, उच्च न्यायालयाने त्यांच्या जामीन अर्जावरील निर्णय प्रलंबित ठेवला आहे.
