रत्नागिरी : स्थानिक स्वराज्य संस्थांच्या निवडणुका तोंडावर आल्या असताना, कोकणात महाराष्ट्र नवनिर्माण सेनेला (मनसे) मोठा धक्का बसला आहे. मनसेचे रत्नागिरीतील प्रमुख नेते वैभव खेडेकर यांनी शेकडो कार्यकर्त्यांसह भाजपमध्ये प्रवेश करण्याचा निर्णय घेतला आहे. त्यांच्या या निर्णयामुळे कोकणातील राजकीय वर्तुळात मोठी खळबळ उडाली आहे. काल दुपारी 4 वाजता खेडेकर आपल्या कार्यकर्त्यांसह जोरदार शक्तीप्रदर्शन करत मुंबईच्या दिशेने रवाना झाले. यानंतर रात्री खेड येथे मुक्काम करून आज सर्व पदाधिकाऱ्यांसह ते मुंबई गाठतील. यानंतर भाजप कार्यालयात त्यांचा पक्षप्रवेश होईल.
पक्षप्रवेश सोहळा आणि उपस्थित मान्यवर
आज मुंबईतील भाजप कार्यालयात वैभव खेडेकर यांच्या पक्षप्रवेशाचा सोहळा होणार आहे. या कार्यक्रमाला भाजपचे प्रदेशाध्यक्ष रवींद्र चव्हाण, मंत्री नितेश राणे आणि खासदार नारायण राणे उपस्थित राहणार आहेत. खेडेकर यांच्यासोबत मनसेचे माजी जिल्हाध्यक्ष, रत्नागिरी शहरातील काही प्रमुख पदाधिकारी आणि वाहतूक सेनेचे पदाधिकारीही भाजपमध्ये दाखल होण्यासाठी मुंबईला रवाना झाले आहेत.
खेडेकर यांची प्रतिक्रिया
मुंबईला निघण्यापूर्वी वैभव खेडेकर यांनी काळकाई देवीचे दर्शन घेतले आणि माध्यमांशी संवाद साधला. ते म्हणाले, “माझ्या गेल्या 30 वर्षांची मेहनत आता फळाला येत आहे. माझ्यासोबत पक्षातले अनेक कार्यकर्ते आहेत.” त्यांच्या या विधानावरून हे स्पष्ट झाले की, ते मोठ्या संख्येने समर्थकांना घेऊन भाजपमध्ये प्रवेश करत आहेत.
राजकीय समीकरणे बदलणार?
काही दिवसांपूर्वीच मनसेने वैभव खेडेकर यांच्यासह तीन जिल्हाध्यक्ष पदावर काम करणाऱ्या पदाधिकाऱ्यांची पक्षातून हकालपट्टी केली होती. खेडेकर यांच्या भाजप प्रवेशामुळे रत्नागिरी जिल्ह्यातील राजकीय समीकरणे पूर्णपणे बदलण्याची शक्यता आहे. या प्रवेशामुळे कोकणात भाजपची ताकद वाढेल आणि आगामी निवडणुकांमध्ये त्यांना मोठा फायदा होऊ शकतो, असा अंदाज राजकीय विश्लेषक व्यक्त करत आहेत.
