मुंबई : विधान परिषदेच्या ११ जागांसाठी १२ जुलै रोजी होणार असलेल्या निवडणुकीकरिता आतापर्यंत १२ उमेदवारांचे अर्ज आले आहेत. यावेळी विधान परिषदेच्या एका उमेदवारासाठी २३ मतांचा कोटा निश्चित करण्यात आला आहे.
महायुतीकडून भाजपाचे पाच, शिवसेनेचे दोन आणि राष्ट्रवादी काँग्रेसचे दोन उमेदवार निवडणूक लढवत आहेत. महाविकास आघाडीने तीन उमेदवार दिले आहेत. काँग्रेस, राशप आणि शिउबाठा यांनी प्रत्येकी एक उमेदवार दिला आहे.
महाविकास आघाडीचे तीन उमेदवार
विधानसभेतील एकूण आमदारांची संख्या भागिले विधानपरिषदेतील रिक्त जागांची संख्या अधिक एक या पद्धतीने कोटा ठरतो. राज्य विधानसभेच्या एकूण जागा २८८ आहेत. पण, लोकसभा निवडणुकीत विजयी झालेल्या काही आमदारांनी राजीनामे दिले आहेत. त्यामुळे आता हे संख्याबळ २७४ वर आले आहे. विधानसभेच्या एकूण जागा २७४ जागांचा रिक्त जागा ११ +१ म्हणजेच १२ ने भागाकार केला तर २२.८३३ हे उत्तर येतं. त्यामुळे विधानपरिषदेवर निवडून येण्यासाठी २३ मतांचा कोटा निश्चित करण्यात आला आहे.
यावेळी २३ मतांचा कोटा असल्यामुळे महायुतीला नऊ उमेदवारांच्या विजयासाठी २०७ मतांची आवश्यकता आहे. महायुतीकडे सध्या २०१ आमदारांची मते आहेत. यात भाजपाच्या १०३, शिवसेनेच्या ३७ आणि राष्ट्रवादी काँग्रेसच्या ३९ आमदारांची मते आहेत. या व्यतिरिक्त तेरा अपक्ष आणि लहान पक्षांच्या नऊ आमदारांची मते महायुतीकडे आहेत. एमआयएमचे दोन आमदार आणि माकपचा एक आमदार तटस्थ राहणार आहे. काँग्रेसच्या ३७, राशपच्या १३, शिउबाठाच्या १५ आमदारांच्या मतांसह शेकापच्या एका आमदाराचे मत आणि एका अपक्ष आमदाराचे मत महाविकास आघाडीकडे आहे. मविआकडे ६७ मते आहेत आणि त्यांना तिन्ही उमेदवारांच्या विजयासाठी ६९ मतांची आवश्यकता आहे. थोडक्यात मविआला दोन आणि महायुतीला सहा मतांची कमतरता भासत आहे.
