CJP Meeting: नीट (NEET) परीक्षा गैरव्यवहार प्रकरणात पुकारलेल्या देशव्यापी आंदोलनाला मोठे यश मिळून केंद्रीय शिक्षण मंत्री धर्मेंद्र प्रधान यांच्या राजीनाम्यानंतर 'कॉकरोच जनता पार्टी' (CJP) कमालीची चर्चेत आली आहे. जंतर-मंतरवरील तीव्र निदर्शनांनंतर प्रकृती अस्वास्थ्यामुळे वैद्यकीय उपचारांखाली असलेले पक्षाध्यक्ष अभिजीत दिपके हे छत्रपती संभाजीनगर येथील आपल्या मूळ निवासस्थानी परतले आहेत. दिपके यांच्या स्वागतासाठी समर्थकांनी प्रचंड गर्दी केली होती.
या पार्श्वभूमीवर, पक्षाची पुढील दिशा आणि राजकीय रणनीती निश्चित करण्यासाठी CJP च्या राष्ट्रीय कोर कमिटीची तातडीची बैठक छत्रपती संभाजीनगर येथे दिपके यांच्या घरी बोलावण्यात आली आहे. या महत्त्वपूर्ण बैठकीसाठी देशाच्या विविध भागांतून 15 ते 20 प्रमुख पदाधिकारी दाखल होत असून, सर्वांना तसे अधिकृत संदेश पाठवण्यात आले आहेत.
परदेशी निधीवरून आरोपांचे वादळ आणि प्रशासकीय घेराव
एकीकडे आंदोलनाचा प्रभाव वाढतोय, तर दुसरीकडे CJP वर राजकीय विरोधकांकडून गंभीर आरोप केले जात आहेत. पक्षाला परदेशातून मिळणाऱ्या आर्थिक निधीवर प्रश्नचिन्ह उपस्थित केले असून, दिपके यांच्या उच्च शिक्षणासाठी तसेच त्यांचे वडील सेवानिवृत्त भगवानराव दिपके यांच्या आर्थिक व्यवहारांची सखोल चौकशी करण्याची मागणी प्रशासनाकडे पत्राद्वारे करण्यात आली आहे. या राजकीय घडामोडींमुळे सत्ताधाऱ्यांची डोकेदुखी वाढली असून, केंद्रीय तपास यंत्रणांच्या हालचालींवरही लक्ष ठेवले जात आहे.
E20 इंधनाचा नवा मुद्दा अन् पंतप्रधान मोदींना माफीचे आव्हान
या महत्त्वाच्या बैठकीमध्ये E20 इंधन धोरणाविरोधात देशव्यापी लढा उभारण्यावर सविस्तर चर्चा होण्याची शक्यता आहे. दिल्लीचे माजी मुख्यमंत्री अरविंद केजरीवाल यांनी E20 मुद्द्यावर थेट पंतप्रधान नरेंद्र मोदी यांच्या निवासस्थानावर मोर्चा काढण्याची घोषणा केली आहे, ज्याला CJP कडून पाठिंबा मिळण्याचे संकेत आहेत.
हेही वाचा – Ganesh Naik : 'माझ्या नादाला लागलात तर…'; गणेश नाईक यांचा आणि एकनाथ शिंदे यांना इशारा
याच दरम्यान, पंतप्रधान मोदींनी आंदोलकांची जाहीर माफी मागावी, अशी थेट आणि आक्रमक मागणी अभिजीत दिपके यांनी केली आहे. त्यामुळे संभाजीनगरमध्ये पार पडणाऱ्या या बैठकीतून नेमका काय निर्णय निघतो, याकडे संपूर्ण देशाचे लक्ष लागले आहे.
