Rio Olympic Velodrome Fire: 2016 च्या रिओ ऑलिम्पिक खेळांचे साक्षीदार असलेल्या ऐतिहासिक 'ऑलिम्पिक वेलोड्रोम'ला बुधवारी पहाटे भीषण आग लागली. या आगीत मैदानाच्या छताचे मोठ्या प्रमाणावर नुकसान झाले असून, परिस्थितीवर नियंत्रण मिळवण्यासाठी अग्निशमन दलाच्या 80 जवानांना आणि 20 गाड्यांना शर्थीचे प्रयत्न करावे लागले. सुदैवाने, या घटनेत कोणतीही जीवितहानी झालेली नाही.
पहाटेच्या सुमारास आगीचे तांडव
राज्याच्या लष्करी अग्निशमन विभागाने दिलेल्या माहितीनुसार, स्थानिक वेळेनुसार बुधवारी पहाटे 4:17 वाजता आगीची वर्दी मिळाली. अग्निशमन दलाच्या तुकड्या तातडीने घटनास्थळी दाखल झाल्या. वेलोड्रोमच्या कॅनव्हासच्या छताला लागलेली आग वेगाने पसरत होती. मात्र, जवानांनी तत्परता दाखवल्यामुळे ही आग संकुलाच्या इतर भागांमध्ये पसरण्यापासून रोखण्यात यश आले.
ऑलिम्पिक संग्रहालयातील अमूल्य ठेव्याचे संरक्षण
या वेलोड्रोममध्ये एक विशेष ऑलिम्पिक संग्रहालय आहे, जिथे ऑलिम्पिक ज्योत, विविध पदके आणि खेळांच्या इतिहासातील महत्त्वाच्या वस्तू जतन करून ठेवण्यात आल्या आहेत. आग विझवण्याचे काम सुरू असतानाच, अग्निशमन दलाचे जवान या ऐतिहासिक कलावस्तूंचे संरक्षण करण्यासाठी इमारतीच्या आत झुंज देत होते, अशी माहिती लेफ्टनंट कर्नल फॅबिओ कॉन्ट्रेरास यांनी दिली. रिओ डी जनेरियोचे महापौर एडुआर्डो कॅव्हॅलिएरे यांनी स्पष्ट केले की, वेलोड्रोम आणि संग्रहालयाला आगीचा फारसा फटका बसलेला नाही.
ब्राझीलचे प्रमुख क्रीडा केंद्र धोक्यात?
हे वेलोड्रोम केवळ ऐतिहासिक स्मारक नसून, ब्राझीलमधील सर्वात मोठे आणि प्रमुख ट्रॅक सायकलिंग केंद्र आहे. सध्या हे ठिकाण राष्ट्रीय वेटलिफ्टिंग आणि सायकलिंग संघांसाठी मुख्य प्रशिक्षण तळ म्हणून वापरले जाते. त्यामुळे या आगीचा खेळाडूंच्या सरावावर परिणाम होण्याची शक्यता वर्तवण्यात येत आहे. फॉरेन्सिक तज्ञ सध्या आगीच्या कारणांचा आणि नुकसानीच्या व्याप्तीचा शोध घेत आहेत.
आगीच्या घटनांची पुनरावृत्ती
वेलोड्रोमच्या सुरक्षेबाबत आता प्रश्नचिन्ह उपस्थित केले जात आहे. 2016 मध्ये ऑलिम्पिकसाठी बांधण्यात आलेल्या या वास्तूच्या छताला यापूर्वी 2017 मध्ये दोनदा आग लागली होती. वारंवार घडणाऱ्या या घटनांमुळे शहर प्रशासनाच्या व्यवस्थापनावर टीका होत आहे. सध्या आग पूर्णपणे विझवण्यात आली असून प्रशासनाकडून दुरुस्तीच्या कामाचे नियोजन केले जात आहे.
