500 Rupees Discount for Jai Shri Ram Slogan : पश्चिम बंगालमधील विधानसभा निवडणुकीचे वारे वाहत असतानाच कोलकाता येथील एका प्रसिद्ध हृदयरोग तज्ज्ञाने (Cardiologist) दिलेल्या ऑफरमुळे राजकीय वर्तुळात मोठी खळबळ उडाली आहे. डॉ. पी. के. हाजरा असे या डॉक्टरांचे नाव असून, त्यांनी आपल्या क्लिनिकमध्ये येणाऱ्या रुग्णांसाठी एक आगळीवेगळी सवलत जाहीर केली आहे. त्यांच्या सोशल मीडिया पोस्टनुसार, जे रुग्ण त्यांच्या केबिनमध्ये येऊन ‘जय श्री राम’चा नारा देतील, त्यांना तपासणी शुल्कामध्ये (Consultation Fee) थेट 500 रुपयांची झटपट सूट दिली जाणार आहे. निवडणुकीच्या वातावरणात डॉक्टरांच्या या भूमिकेवर सत्ताधारी तृणमूल काँग्रेसने कडाडून टीका केली आहे.
शुल्कात कपात आणि भाजपबद्दलचे प्रेम
डॉ. पी.के. हाजरा यांनी या निर्णयामागची भूमिका स्पष्ट करताना सांगितले की, ही त्यांची वैयक्तिक संकल्पना आहे. पूर्वी त्यांची फी 2000 रुपये होती, जी त्यांनी निवडणुकीच्या पार्श्वभूमीवर आधी 1500 रुपये केली होती. आता ‘जय श्री राम’चा नारा देणाऱ्या रुग्णांसाठी त्यांनी ही फी केवळ 1000 रुपये करण्याचा निर्णय घेतला आहे. हाजरा यांनी उघडपणे कबूल केले की, ते स्वतः भाजपचे समर्थक आहेत आणि भाजपशासित राज्यांमध्ये झालेली प्रगती त्यांना प्रभावित करते. ही सवलत केवळ त्यांच्या खासगी क्लिनिकपुरती मर्यादित असून, ते काम करत असलेल्या हॉस्पिटलचा याच्याशी कोणताही संबंध नसल्याचेही त्यांनी स्पष्ट केले आहे. तसेच, हा त्यांचा स्वतःचा राजकीय प्रचार असल्याचे आणि सांप्रदायिकतेशी याचा कोणताही संबंध नसल्याचे त्यांनी म्हटले आहे.
परराज्यात जाणाऱ्या रुग्णांबाबत व्यक्त केली चिंता
आपल्या निर्णयाचे समर्थन करताना डॉ. हाजरा यांनी पश्चिम बंगालमधील आरोग्य व्यवस्थेवर भाष्य केले. “जेव्हा मी बंगालच्या रुग्णांना उपचारांसाठी आसाम, ओडिशा किंवा दक्षिण भारतात जाताना पाहतो, तेव्हा मला वाईट वाटते,” असे त्यांनी एका वृत्तसंस्थेशी बोलताना सांगितले. स्थानिक पातळीवर आरोग्य सेवांचे मानक सुधारणे आणि राज्यातील रुग्णांचे बाहेर जाणे थांबवणे, हा यामागचा मूळ उद्देश असल्याचे त्यांनी म्हटले आहे. यामध्ये कोणताही अनैतिक प्रकार नसून हा एक सेवाभाव असल्याचा दावा त्यांनी केला आहे.
राजकीय महत्त्वाकांक्षा आणि तिकीटाची आशा
डॉ. हाजरा यांच्या या उपक्रमाला केवळ समाजसेवा न मानता त्यांच्या राजकीय महत्त्वाकांक्षेशी जोडले जात आहे. त्यांनी स्वतःच अशा भावना व्यक्त केल्या आहेत की, त्यांना पश्चिम मेदिनीपूर जिल्ह्यातील त्यांच्या मूळ गावी असलेल्या ‘पिंगला’ मतदारसंघातून भाजपकडून उमेदवारी मिळेल अशी आशा आहे. भाजपच्या काही स्थानिक नेत्यांनी या उपक्रमाचे स्वागत केले असून, राज्यात बदलाची लाट असल्याचे हे लक्षण असल्याचे म्हटले आहे. मात्र, ही ऑफर सोशल मीडियावर वेगाने व्हायरल झाल्यामुळे निवडणुकीच्या रणधुमाळीत सांप्रदायिकतेचा वापर होत असल्याचा आरोप विरोधकांकडून होत आहे.
Kolkata, West Bengal: A doctor has posted on social media stating that any individual visiting him for a consultation and saying 'Jai Shri Ram' will receive an instant discount of ₹500 Doctor P.K. Hazra says, "… I have been observing free patient care for a long time, and I… pic.twitter.com/n7oJahLFWD — IANS (@ians_india) April 14, 2026
तृणमूल काँग्रेसची कडाडून टीका
सत्ताधारी तृणमूल काँग्रेसने (TMC) या प्रकारावर तीव्र आक्षेप घेतला आहे. टीएमसीचे ज्येष्ठ नेते डॉ. निर्मल माझी यांनी आरोप केला की, डॉ. हाजरा हे भाजपच्या नेत्यांच्या नजरेत येण्यासाठी आणि राजकीय फायदा लाटण्यासाठी अशा प्रकारचे स्टंट करत आहेत. डॉक्टरांसारख्या पवित्र व्यवसायात राजकीय घोषणाबाजी आणणे चुकीचे असल्याचे त्यांनी म्हटले आहे. या महिन्याच्या अखेरीस बंगालमध्ये मतदान होणार असल्याने, या घटनेने आधीच तापलेले राजकीय वातावरण अधिकच चिघळले आहे.
