Strait of Hormuz Crisis: मध्य पूर्वेतील युद्धाने आता 5 व्या दिवशी अत्यंत भीषण वळण घेतले आहे. इस्रायल आणि अमेरिकेच्या हल्ल्यांनी घायाळ झालेल्या इराणने आता जगाची नाडी मानली जाणारी 'होर्मुजची सामुद्रधुनी' (Strait of Hormuz) बंद करण्याचा टोकाचा निर्णय घेतला आहे. इराणच्या या निर्णयामुळे जागतिक इंधन पुरवठा साखळी पूर्णपणे कोलमडण्याची चिन्हे असून, याचा सर्वाधिक फटका भारताला बसण्याची दाट शक्यता निर्माण झाली आहे.
केवळ 'चिनी' जहाजांनाच प्रवेश; इतरांवर हल्ल्याची धमकी
इराणच्या रिव्होल्यूशनरी गार्ड्सने (IRGC) अधिकृतपणे जाहीर केले आहे की, होर्मुजच्या जलमार्गातून आता केवळ चीनच्या जहाजांनाच प्रवासाची मुभा असेल. पश्चिमी राष्ट्रे किंवा त्यांचे सहकारी देश (ज्यात भारताचाही समावेश होतो) यांची जहाजे या मार्गावर दिसल्यास त्यावर थेट लष्करी हल्ला केला जाईल, असा गंभीर इशारा इराणने दिला आहे. इराणने आपली ढासळती अर्थव्यवस्था वाचवण्यासाठी चीनचा आधार घेतला असला तरी, उर्वरित जगासाठी हा मार्ग रोखून धरल्याने आंतरराष्ट्रीय तणाव वाढला आहे.
भारताची डोकेदुखी वाढली; पेट्रोल-डिझेल महागणार?
इराणचा हा निर्णय भारतासाठी अत्यंत धक्कादायक मानला जात आहे. भारताची कच्च्या तेलाची मोठी आयात याच सामुद्रधुनीतून केली जाते. जगातील एकूण तेल व्यापारापैकी सुमारे 30 टक्के व्यापार याच मार्गावर अवलंबून आहे. हा मार्ग बंद झाल्याने देशात इंधनाचा मोठा तुटवडा निर्माण होऊ शकतो आणि पर्यायाने पेट्रोल-डिझेलच्या किमती गगनाला भिडण्याची भीती व्यक्त होत आहे. भारतासाठी हा आर्थिक आणि धोरणात्मकदृष्ट्या अत्यंत कठीण काळ मानला जात आहे.
डोनाल्ड ट्रम्प यांचे इराणला सणसणीत प्रत्युत्तर
इराणच्या या निर्णयाला अमेरिकेचे राष्ट्राध्यक्ष डोनाल्ड ट्रम्प यांनी चोख उत्तर दिले आहे. "अमेरिकन नौदल या मार्गाला सुरक्षा पुरवेल आणि तेलाची वाहतूक कोणत्याही परिस्थितीत खंडित होऊ देणार नाही," अशी ग्वाही ट्रम्प यांनी दिली आहे. जगाला इंधन संकटात ढकलणाऱ्या इराणच्या या दादागिरीला अमेरिका लष्करी बळाने झुगारून लावेल, असे स्पष्ट संकेत त्यांनी दिले आहेत. यामुळे आता अमेरिकन नौदल विरुद्ध इराण असा थेट सामना होण्याची शक्यता आहे.
