Amit Thackeray : महाराष्ट्र नवनिर्माण सेनेचे नेते अमित ठाकरे यांनी परप्रांतीय रिक्षाचालकांच्या आक्रमक भूमिकेचा कडक शब्दांत समाचार घेतला आहे. "ज्यांना मराठी भाषेचा आदर करता येत नाही, त्यांनी खुशाल आपल्या गावी परत जावे," अशा स्पष्ट शब्दांत त्यांनी पिंपरी-चिंचवडमधील पत्रकार परिषदेत ठणकावून सांगितले. यावेळी त्यांनी रिक्षाचालकांसाठी मराठी भाषेच्या सक्तीचे जाहीर समर्थन केले.
मुंबई बंदची धमकी आणि मनसेचा प्रत्युत्तर
परप्रांतीय रिक्षा संघटनांनी आगामी 4 तारखेला पुकारलेल्या संपावर अमित ठाकरे यांनी आक्रमक पवित्रा घेतला आहे. "मुंबई कुणाच्या बापाची नाही आणि मुंबई ठप्प करण्याची ताकद या संघटनांमध्ये नाही," अशा शब्दांत त्यांनी संपाच्या धमकीला केराची टोपली दाखवली. जरी या संघटनांनी संप पुकारला, तरी आमचे मराठी रिक्षाचालक रस्त्यावर उतरून मुंबईची वाहतूक व्यवस्था सुरळीत ठेवतील, असा विश्वास त्यांनी व्यक्त केला. संपाच्या दिवशी परिस्थिती पाहून मनसे आपली पुढील भूमिका जाहीर करेल, असा इशाराही त्यांनी यावेळी दिला.
हेही वाचा – श्याम मानवांच्या बोलण्याने काही फरक पडत नाही…'; भूषण गवईंच्या समर्थनासाठी देवेंद्र फडणवीस मैदानात
'लाडकी बहीण' योजना आणि ड्रग्ज संकटावर टीका
अमित ठाकरे यांनी केवळ भाषिक मुद्द्यावरच नव्हे, तर राज्य सरकारच्या धोरणांवरही ताशेरे ओढले. 'लाडकी बहीण' योजनेच्या अंमलबजावणीतील त्रुटींवर बोट ठेवत त्यांनी सरकारच्या घाईवर टीका केली. तसेच, राज्यातील शाळा-महाविद्यालयांच्या परिसरात पसरणाऱ्या ड्रग्जच्या विळख्याबाबत त्यांनी गंभीर चिंता व्यक्त केली. "गृहमंत्री देवेंद्र फडणवीस यांनी पोलिसांना पूर्ण मोकळीक दिली, तरच राज्यातील गुन्हेगारी आणि अमली पदार्थांचे रॅकेट मोडीत काढता येईल," असे मत त्यांनी व्यक्त केले.
नेस्को दुर्घटना आणि राज ठाकरेंचा वारसा
गोरेगावच्या नेस्को (NESCO) सेंटरमध्ये झालेल्या दुर्घटनेत 2 तरुणींना प्राण गमवावे लागले, परंतु अद्याप ठोस कारवाई झालेली नसल्याबद्दल त्यांनी संताप व्यक्त केला. या प्रकरणाची सखोल चौकशी करून दोषींना कठोर शिक्षा करण्याची मागणी त्यांनी केली. आपल्या राजकीय प्रवासाबाबत बोलताना अमित ठाकरे भावूक झाले. "मी राज ठाकरे यांच्याकडे पाहूनच राजकारणात पाऊल ठेवले आहे. त्यांचे स्पष्टवक्तेपण हीच माझी प्रेरणा आहे," असे सांगत त्यांनी राज ठाकरेंचा वारसा पुढे नेण्याचा निर्धार व्यक्त केला.
