Laxman Hake Video : ओबीसी हक्कांचे राज्यस्तरीय नेते लक्ष्मण हाके यांचा एक अंतर्गत संभाषणाचा व्हिडिओ समाजमाध्यमांवर वेगाने प्रसारित होत आहे. या क्लिपमध्ये हाके हे एका मोठ्या राजकीय चेहऱ्यावर आणि त्यांच्या कार्यपद्धतीवर थेट निशाणा साधताना दिसत आहेत. “त्यांच्याकडे मोठी यंत्रणा, संघटन आणि प्रसारमाध्यमांना हाताळण्याची ताकद आहे. त्यांनी आंदोलन न करण्याचे आदेश दिले होते, परंतु मी दुसऱ्याच दिवशी जनतेला रस्त्यावर उतरून जीआरची होळी करण्याचे आवाहन केले,” असा दावा हाके यांनी या व्हीडिओमध्ये केला आहे. याशिवाय, संबंधित नेत्याने मुख्यमंत्री आणि दोन्ही उपमुख्यमंत्र्यांची भेट घेण्यासाठी केवळ स्वतःच्या कुटुंबातील सदस्यांना सोबत नेल्याचा आक्षेपही त्यांनी घेतला आहे. मात्र, या संपूर्ण वक्तव्यात त्यांनी कोणत्याही नेत्याचा जाहीर उल्लेख केलेला नाही.
‘मला बदनाम करण्याचा डाव’; व्हायरल क्लिपवर लक्ष्मण हाकेंची पहिली प्रतिक्रिया
हा व्हीडिओ राजकीय वर्तुळात चर्चेचा विषय ठरल्यानंतर लक्ष्मण हाके यांनी प्रसारमाध्यमांशी संवाद साधत आपली भूमिका स्पष्ट केली. “हा व्हीडिओ नेमका कधीचा आहे आणि तो अर्धवट का दाखवला जात आहे?” असा उलटसवाल त्यांनी उपस्थित केला आहे. आपण रात्रंदिवस ओबीसी समाजाच्या हक्कांच्या रक्षणासाठी मैदानात लढत असून, मूळ प्रश्नांवरून लक्ष भरकटवण्यासाठीच हा खटाटोप सुरू असल्याचा आरोप त्यांनी केला. तसेच आपण कुणालाही घाबरत नसल्याचंही त्यांनी आवर्जून सांगितलं आहे.
दरम्यान, ही क्लिप पसरवून आपली प्रतिमा मलिन करण्याचा प्रयत्न केला जात असल्याचा आरोप हाके यांनी केला आहे, परंतु अशा कृत्यांनी आपले मनोबल खचणार नाही आणि आपण बहुजनांच्या प्रश्नांवर बोलणे कधीही थांबवणार नाही, असा ठाम विश्वास त्यांनी व्यक्त केला आहे.
