Haryana Crime : संतापजनक! लग्नात महिलांची छेडछाड थांबवण्याचा प्रयत्न करणाऱ्या आंतरराष्ट्रीय बॉडीबिल्डरला संपवलं

Para-athlete Murder in Haryana : हरियाणातील रोहतक (Rohtak) येथे एका विवाह सोहळ्यात महिलांची छेडछाड आणि गैरवर्तन थांबवल्याबद्दल आंतरराष्ट्रीय पॅरा-वेटलिफ्टिंग (Para-Weightlifting) खेळाडू रोहित याला बेदम मारहाण करून ठार मारण्यात आले आहे. ही दुःखद घटना शनिवारी घडली. लग्नात आलेल्या सुमारे 18 ते 20 जणांच्या जमावाने रोहितवर प्राणघातक शस्त्रांनी (Lethal Weapons) हल्ला केला. गंभीर जखमी अवस्थेत त्याला रोहतकच्या पीजीआयएमएस (PGIMS) रुग्णालयात दाखल करण्यात आले होते, मात्र उपचारादरम्यान त्याचा मृत्यू झाला.

भिवानी गावात घडली घटना
ही घटना रोहतकच्या भिवानी गावात घडली. रोहित त्याचा मित्र जतीनच्या एका नातेवाईकाच्या विवाह सोहळ्यालासाठी आला होता. सूत्रांनी दिलेल्या माहितीनुसार, वरात सुरू असताना राहुल नावाच्या एका व्यक्तीने दारूच्या नशेत वरातीत सहभागी झालेल्या महिलांबद्दल अपमानास्पद टिप्पणी करण्यास सुरुवात केली. रोहितने यावर आक्षेप घेतला. सुरुवातीला दोघांमध्ये वादावादी झाली, जी लग्नातील इतर पाहुण्यांनी मध्यस्थी करून थांबवली.

परतीच्या वाटेवर घात लावून हल्ला
सुरुवातीचा वाद मिटल्यानंतर, घरी परतताना राहुल आणि त्याच्यासोबत असलेल्या अनेक साथीदारांनी रोहितच्या कारला रस्त्यात अडवले आणि त्याच्यावर काठी व रॉडने (Sticks and Rods) हल्ला केला. घटनेचे प्रत्यक्षदर्शी असलेले रोहितचे मेहुणे रवी खासा आणि मित्र जतीन यांनी सांगितले की, 18 ते 20 लोकांच्या जमावाने रोहितला बेदम मारहाण केली. ते पॅरा-ॲथलीट असण्यासोबतच जिमखाना (Gymkhana) चालवणारे एक व्यावसायिक देखील होते.

हेही वाचा – Delhi Crime: पतीचे अनैतिक संबंध, गर्भवती असताना अत्याचार… फोन वापरण्यासही बंदी; दिल्लीतील नामांकित उद्योगपतीच्या सुनेनं उचललं टोकाचं पाऊल

उपचारादरम्यान झाला मृत्यू
या दोघांनी तातडीने पोलिसांना फोन करून बोलावले. पोलिसांनी रोहितला स्थानिक रुग्णालयात दाखल केले. मात्र, त्याची प्रकृती गंभीर असल्याने त्याला नंतर पीजीआयएमएस रुग्णालयात हलवण्यात आले. दुर्दैवाने, उपचारादरम्यानच त्याचा मृत्यू झाला. या घटनेनंतर स्थानिक पोलिसांनी गुन्हा दाखल केला असून, आरोपींचा शोध घेण्यासाठी तपास सुरू केला आहे. पोलीस लवकरच आरोपींना पकडतील, अशी अपेक्षा आहे.

सेल्फीच्या वादातून मारहाण?
या घटनेबद्दल बोलताना एका स्थानिक पोलीस अधिकाऱ्याने एका वृत्तसंस्थेला सांगितले की, सेल्फी काढण्यावरून वाद झाला, ज्यामुळे काही तरुणांनी रोहित आणि त्याच्या मित्रावर हल्ला केला. रोहितला गंभीर दुखापती झाल्या आणि रुग्णालयात त्याचा मृत्यू झाला. मात्र, रोहितचे कुटुंबीय आणि प्रत्यक्षदर्शींनी महिलांच्या छेडछाडीला विरोध केल्यामुळे हल्ला झाल्याचा दावा केला आहे.

हेही वाचा – California Shooting Incident: अमेरिकेत वाढदिवसाच्या पार्टीत गोळीबार; 14 जखमी, हल्लेखोर फरार