Maharashtra Budget 2026-27 : राज्याचे मुख्यमंत्री आणि अर्थमंत्री देवेंद्र फडणवीस यांनी 2027 चा अर्थसंकल्प सादर करताना मुंबईच्या विकासाबाबत अत्यंत मोठी घोषणा केली आहे. नवी मुंबई आणि अटल सेतू परिसरातील 'तिसरी मुंबई' विकसित होत असतानाच, आता पालघर जिल्ह्यातील वाढवण (Vadhavan) येथे 'चौथी मुंबई' वसवली जाणार आहे. मुख्यमंत्र्यांनी या अर्थसंकल्पात पायाभूत सुविधांवर भर दिला असून, राज्याच्या प्रगतीचा नवा रोडमॅप मांडला आहे. या वेळी, दिवंगत उपमुख्यमंत्री अजित पवार यांच्या स्मृतींना उजाळा दिला.
वाढवण येथे 'चौथी मुंबई' आणि घरांचा आराखडा
मुख्यमंत्र्यांनी जाहीर केल्यानुसार, वाढवण बंदराच्या परिसरात 'चौथी मुंबई' विकसित केली जाईल. यामुळे उत्तर कोकणातील विकासाला मोठी गती मिळणार आहे. यासोबतच मुंबईतील घरांचा प्रश्न सोडवण्यासाठी दोन महत्त्वाच्या योजना जाहीर करण्यात आल्या आहेत:
झोपडपट्टी पुनर्वसन: मुंबईतील 20 लाख झोपडपट्टी घरांचे पुनर्वसन करण्यासाठी विशेष आराखडा तयार केला जाईल.
परवडणारी घरे: राज्यात 10 लाख परवडणारी घरे उभारली जातील, ज्यापैकी 10 लाख घरे एकट्या MMR क्षेत्रात असतील.
अनधिकृत बांधकामे: नवीन अनधिकृत बांधकामे होणार नाहीत, याची खात्री करण्यासाठी कडक 'रोडमॅप' तयार करण्यात आला आहे.
मेट्रो आणि द्रुतगती मार्गांचे महाजाळे
राज्यातील वाहतूक व्यवस्था वेगवान करण्यासाठी मुख्यमंत्र्यांनी मोठ्या गुंतवणुकीची घोषणा केली आहे. यात प्रामुख्याने रस्ते आणि मेट्रो प्रकल्पांचा समावेश आहे:
मेट्रो मार्ग: राज्यात एकूण 1,200 किमीचे मेट्रो मार्ग विकसित केले जातील. 2029 पर्यंत 165 किमीच्या नवीन मेट्रो मार्गिका पूर्ण करण्याचे उद्दिष्ट आहे.
एक्सप्रेस-वे: राज्यात 6,000 किमीचे नवीन द्रुतगती मार्ग (Expressways) बांधले जातील.
बुलेट ट्रेन: मुंबई-अहमदाबाद बुलेट ट्रेन प्रकल्पातील 5 स्थानकांचे काम 2027 पर्यंत पूर्ण केले जाईल.
हेही वाचा – Maharashtra Budget 2026 : देवेंद्र फडणवीसांची मोठी घोषणा; 50 लाख प्रत्यक्ष रोजगारनिर्मित, आता प्रत्येकजण…
मुंबई आणि पुण्यासाठी विशेष भुयारी मार्ग
मुंबई आणि पुणे या शहरांमधील गर्दी कमी करण्यासाठी अनेक बोगदे आणि भुयारी मार्गांची घोषणा करण्यात आली आहे. गोरेगाव-मुलुंड लिंक रोडचे काम अंतिम टप्प्यात असून, ठाणे ते मुलुंड हा भुयारी मार्ग जून 2028 पर्यंत पूर्ण होईल. तसेच खारघर ते तुर्भे मार्गही लवकरच पूर्ण केला जाईल. मुंबई विमानतळ आणि नवी मुंबई विमानतळ मेट्रोने जोडले जातील. अटल सेतू आणि नवी मुंबई विमानतळाला जोडण्यासाठी 'उलवे किनारी प्रकल्प' पूर्ण केला जाईल. रायगड जिल्ह्यातील पेण आणि नवी मुंबई विमानतळ परिसर 'ग्रीनफिल्ड' म्हणून विकसित केला जाणार आहे.
पर्यटन आणि गुंतवणूक
मुंबईच्या जागतिक स्तरावरील प्रतिमेला अधिक उजाळा देण्यासाठी सरकार दुबई आणि सिंगापूरमध्ये पर्यटन गुंतवणूक परिषद आयोजित करणार आहे. ऐरोली ते कटई नाका भाग 3 चे काम पूर्ण होत असून, ठाणे ते नवी मुंबई आंतरराष्ट्रीय विमानतळ असा उन्नत मार्ग (Elevated Road) तयार करण्याची घोषणाही या अर्थसंकल्पात करण्यात आली आहे. पायाभूत सुविधांच्या या महाजाळ्यामुळे महाराष्ट्र हे देशातील अग्रगण्य राज्य राहील, असा विश्वास मुख्यमंत्र्यांनी व्यक्त केला आहे.
