Former MLA Nirmala Gavit Accident : माजी आमदार निर्मला गावित सोमवारी संध्याकाळी झालेल्या एका गंभीर अपघातात गंभीररीत्या जखमी झाल्या असून त्यांच्यावर नाशिकमधील खासगी रुग्णालयात अतिदक्षता विभागात उपचार सुरू आहेत. नातवाला बाहेर फिरवण्यासाठी घराबाहेर पडलेल्या गावित यांना मागून एका कारने धडक दिली. घटनेचा सीसीटीव्ही व्हिडिओ आज सकाळपासून सोशल मीडियावर मोठ्या प्रमाणात प्रसारित होत असून या अपघाताचा थरार पाहून जनतेत संतापाची लाट उसळली आहे.
प्राप्त माहितीनुसार, गावित आपल्या नातवाला घेऊन रस्त्याच्या कडेला निवांत फेरफटका मारत होत्या. त्याचवेळी बेशिस्त वेगात येणाऱ्या कारने अचानक त्यांच्या मागील बाजूने जोरदार धडक दिली. या अचानक झालेल्या अपघातात त्या जोरात पुढे फेकल्या जाऊन गंभीर जखमी झाल्या. आसपासच्या नागरिकांनी तत्काळ मदतीसाठी धाव घेत त्यांना उचलून रुग्णवाहिकेद्वारे रुग्णालयात हलवले.
हेही वाचा – Kalyan Traffic Alert: कल्याणमध्ये वाहतुकीत मोठा बदल; महत्त्वाचा पूल एवढ्या दिवसांसाठी बंद
या अपघातात गावित यांच्या डोक्याला आणि पायावर गंभीर दुखापत झाली असून त्यांची प्रकृती चिंताजनक आहे. डॉक्टरांची विशेष तज्ज्ञ टीम त्यांच्यावर लक्ष ठेवून उपचार करत आहे. दरम्यान, अपघाताचा व्हिडिओ बाहेर आल्यानंतर वाहन चालकाच्या बेफिकिरीबद्दल मोठ्या प्रमाणात नाराजी व्यक्त होत आहे. चालकाने गावित यांना धडक दिल्यानंतर कार न थांबवता घटनास्थळावरून पळ काढला. त्यामुळे नागरिकांकडून चालकावर कठोर कारवाईची मागणी होत आहे. पोलीस या प्रकरणाचा तपास करत असून सीसीटीव्हीच्या आधारे वाहन आणि चालकाचा शोध घेण्याचा प्रयत्न करत आहेत.
