BMC Election Result Eknath Shinde : मुंबई महानगरपालिकेच्या निकालांनी राज्यातील राजकारणात मोठा भूकंप घडवून आणला आहे. महायुतीने 227 पैकी 114 हा बहुमताचा आकडा पार करत मुंबईवर भगवा फडकवला असला, तरी सत्तास्थापनेच्या अंतिम समीकरणाआधी आता 'हॉटेल पॉलिटिक्स'ला उधाण आले आहे. मुख्यमंत्री एकनाथ शिंदे यांच्या नेतृत्वाखालील शिवसेनेने आपल्या सर्व 29 नवनिर्वाचित नगरसेवकांना सुरक्षित ठेवण्यासाठी वांद्रे येथील आलिशान 'ताज लँड्स एंड' (Taj Lands End) हॉटेलमध्ये हलवण्याचा मोठा निर्णय घेतला आहे.
फोडाफोडीची धास्ती की महापौरपदासाठीची तटबंदी?
मुंबई महापालिकेत भाजपने 89 जागांसह सर्वात मोठा पक्ष होण्याचा मान मिळवला आहे, तर शिंदे यांच्या शिवसेनेने 29 जागा जिंकल्या आहेत. दुसरीकडे, उद्धव ठाकरेंची शिवसेना (UBT) 65 जागांवर विजयी झाली आहे. अशा स्थितीत फोडाफोडीचे राजकारण टाळण्यासाठी आणि आपल्या नगरसेवकांशी इतर कोणीही संपर्क साधू नये, यासाठी शिंदे यांनी हा 'ताज' प्लॅन आखला आहे. आज, 17 जानेवारी 2026 रोजी दुपारी 3:00 वाजेपर्यंत सर्व नगरसेवकांना हॉटेलमध्ये पोहोचण्याचे कडक आदेश देण्यात आले आहेत.
पुढील 3 दिवस नगरसेवक राहणार 'आऊट ऑफ रिच'
सूत्रांनी दिलेल्या माहितीनुसार, हे सर्व नगरसेवक पुढील 3 दिवस हॉटेल ताजमध्येच मुक्काम ठोकणार आहेत. या काळात कोणालाही बाहेर जाण्याची किंवा बाहेरील व्यक्तींना भेटण्याची परवानगी नसेल. राज्यातील 2022 च्या सत्तासंघर्षाच्या वेळीही अशाच प्रकारचे 'हॉटेल पॉलिटिक्स' पाहायला मिळाले होते. आता मुंबईच्या महापौराची निवड होईपर्यंत पक्षाची 'वज्रमूठ' कायम राहावी, हाच यामागचा मुख्य उद्देश असल्याचे बोलले जात आहे.
हेही वाचा – Pune Mayor: भाजपच्या दणदणीत विजयानंतर पुण्यात महापौरपदासाठी रस्सीखेच सुरू; 'या' नावांची जोरदार चर्चा
महायुतीचे संख्याबळ आणि सत्तास्थापनेचा पेच
मुंबई महापालिकेत महायुतीकडे (भाजप + शिवसेना शिंदे गट + राष्ट्रवादी) मिळून 121 हून अधिक जागांचे संख्याबळ आहे, जे बहुमतासाठी आवश्यक असलेल्या 114 पेक्षा जास्त आहे. मात्र, महापौर नेमका कोणाचा होणार, यावर अद्याप शिक्कामोर्तब झालेले नाही. भाजपच्या अनेक नेत्यांनी महापौरपदावर दावा ठोकला असून, शिंदे गटही आपली ताकद दाखवण्याचा प्रयत्न करत आहे. त्यामुळे या 3 दिवसांच्या मुक्कामात नगरसेवकांशी संवाद साधून अंतर्गत वाद मिटवण्याची आणि महापौर निवडीसाठीची रणनीती अंतिम करण्याची शक्यता आहे.
विरोधकांच्या हालचालींवर बारीक लक्ष
एकनाथ शिंदे यांनी घेतलेला हा निर्णय केवळ सावधगिरीचा नसून एक राजकीय संदेशही मानला जात आहे. ठाकरे गटाकडून शिंदे यांच्या नगरसेवकांशी संपर्क साधला जाऊ शकतो, अशी कुणकुण लागताच शिंदे यांनी ही फिल्डिंग लावली आहे. निकालानंतर अवघ्या 24 तासांत नगरसेवकांना 'लॉक' केल्यामुळे मुंबईच्या राजकारणात सध्या मोठी खळबळ उडाली आहे. आता हे नगरसेवक थेट महापौर निवडीच्या दिवशीच बाहेर येतील की त्याआधी काही वेगळे ट्विस्ट पाहायला मिळतील, याकडे संपूर्ण राज्याचे लक्ष लागले आहे.
