Sanjay Raut: राज्यसभेच्या निवडणुकीनंतर शिवसेना (ठाकरे) गटामध्ये अंतर्गत धुसफूस सुरू असल्याच्या चर्चा राजकीय वर्तुळात रंगल्या आहेत. विशेषतः आमदार आदित्य ठाकरे आणि खासदार संजय राऊत यांच्यातील वाद विकोपाला गेल्याचे आणि राऊत पक्षाला सोडचिठ्ठी देणार असल्याचे बोलले जात होते. मात्र, संजय राऊत यांनी स्वतः समोर येत हे सर्व दावे फेटाळून लावले आहेत. “आदित्य ठाकरेंसोबत माझे कसले मतभेद असणार? या केवळ अफवा आहेत,” अशा शब्दांत त्यांनी आपली भूमिका स्पष्ट केली आहे.
मी पक्षात पद मिळवण्यासाठी आलो नाही – संजय राऊत
संजय राऊत यांनी आपल्या निष्ठेचा पुनरुच्चार करताना म्हटले की, ते या पक्षात केवळ आमदार, खासदार किंवा मंत्री होण्यासाठी आलेले नाहीत. “मी बाळासाहेब ठाकरे यांच्या विचारांनी प्रेरित होऊन या पक्षात काम करत आहे. महाराष्ट्राच्या कानाकोपऱ्यात पक्षाचा विचार पोहोचवणे आणि संघटनेचे काम करणे हेच माझे ध्येय आहे,” असे त्यांनी नमूद केले. जरी त्यांना पक्षाचा नेता आणि अनेक वर्षे खासदार केले असले, तरी ते स्वतःला आजही एक सामान्य शिवसैनिकच मानतात, असेही त्यांनी ठामपणे सांगितले.
दिल्लीतील कार्यक्रमामुळे बैठकीला गैरहजेरी; अफवांना पूर्णविराम
ज्या बैठकीवरून मतभेदांच्या चर्चांना उधाण आले होते, त्याबाबत स्पष्टीकरण देताना राऊत म्हणाले की, “ज्या बैठकीचा उल्लेख केला जात आहे, तिथे मी उपस्थित नव्हतो कारण मी दिल्लीत माझ्या पुस्तकाच्या कार्यक्रमात व्यस्त होतो. कोणी मला किंवा आदित्य ठाकरे यांना फोन करून सत्य विचारले का?” असा सवाल त्यांनी उपस्थित केला. कोणत्याही अधिकृत माहितीशिवाय अशा बातम्या पसरवणे चुकीचे असल्याचे सांगत त्यांनी आदित्य ठाकरेंसोबतच्या वादावर पूर्णविराम दिला आहे.
हेही वाचा – Dhananjay Mude : “जन्मताच ‘तो’ त्रास, तरी कसा वाचलो देव जाणे” धनंजय मुंडेंनी बोलून दाखवली मनातील खंत
‘परखडपणे मते मांडणे हा माझा दोष नाही, ती बाळासाहेबांची शिकवण’
संजय राऊत यांनी आपल्या कार्यशैलीवर भाष्य करताना सांगितले की, ते आपली मते नेहमीच परखडपणे मांडतात. “माझा दोष इतकाच आहे की मी माझी मते स्पष्टपणे समोर ठेवतो, पण हे मी वंदनीय बाळासाहेब ठाकरे यांच्याकडूनच शिकलो आहे,” असे त्यांनी अभिमानाने सांगितले. पक्षांतर्गत कुरघोडीच्या बातम्यांमध्ये कोणतेही तथ्य नसून आपण बाळासाहेबांच्या विचारांशी आणि ठाकरे कुटुंबाशी एकनिष्ठ असल्याचे त्यांनी पुन्हा एकदा सिद्ध केले आहे.
