FDA Supplement Alert: ऑनलाइन शॉपिंग प्लॅटफॉर्म Amazon, eBay आणि Etsy वर वजन कमी करण्यासाठी विकल्या जाणाऱ्या सप्लिमेंट्सबाबत अमेरिकेच्या अन्न आणि औषध प्रशासनाने (FDA) गंभीर इशारा दिला आहे. तपासादरम्यान तब्बल 29 प्रकारच्या सप्लिमेंट्समध्ये 'यलो ओलेंडर' (Yellow Oleander) नावाचे घातक विष आढळले असून, या उत्पादनांचा वापर जिवावर बेतू शकतो, असे स्पष्ट करण्यात आले आहे.
नैसर्गिक घटकांच्या नावाखाली 'पिवळ्या कण्हेरी'ची भेसळ
हे सप्लिमेंट्स प्रामुख्याने Tejocote root (तेजोकोट रूट) किंवा Brazilian seed (ब्राझिलियन सीड) या नावांनी विकले जात होते. कंपन्यांनी हे घटक नैसर्गिक आणि अँटिऑक्सिडंट गुणांनी युक्त असल्याचा दावा केला होता. मात्र, प्रयोगशाळेतील चाचणीत असे दिसून आले की, यामध्ये प्रत्यक्षात मेक्सिकोतील 'पिवळी कण्हेर' या विषारी वनस्पतीचा वापर करण्यात आला आहे. ही वनस्पती मानवी आरोग्यासाठी अत्यंत घातक मानली जाते.
आरोग्यावर होणारे गंभीर परिणाम
FDA च्या माहितीनुसार, 'यलो ओलेंडर'च्या सेवनामुळे हृदय, मेंदू आणि पचनसंस्थेवर गंभीर परिणाम होतात. याचे मुख्य धोके खालीलप्रमाणे आहेत:
हृदयविकाराचा झटका (Cardiac Arrest): यामुळे हृदयाचे ठोके अनियंत्रित होऊ शकतात.
मानसिक गोंधळ आणि संभ्रम: मेंदूच्या कार्यक्षमतेवर विपरीत परिणाम होतो.
पचनसंस्थेचे विकार: तीव्र पोटदुखी, उलट्या आणि जुलाब होणे.
तज्ज्ञांच्या मते, ही वनस्पती भूक दाबून टाकते, ज्यामुळे वजन कमी होत असल्याचा भास होतो; परंतु ही पद्धत पूर्णपणे जीवघेणी आहे.
उत्पादने परत घेण्यास काही कंपन्यांचा नकार
या प्रकरणानंतर काही कंपन्यांनी आपली उत्पादने बाजारातून परत (Recall) घेण्यास सुरुवात केली आहे. मात्र, अनेक कंपन्यांनी अद्याप FDA ला प्रतिसाद दिलेला नाही, तर काहींनी उत्पादन मागे घेण्यास नकार दिला आहे. विशेष म्हणजे, ही विषारी बी दिसायला नैसर्गिक 'कँडलनट्स' (Candlenuts) सारखीच असल्याने ग्राहक अजाणतेपणे तिचे सेवन करत आहेत.
हेही वाचा – WiFi Router Replacement: तुमचा WiFi स्लो झालाय? तर आताच 'हे' करा आणि मिळवा जलद आणि सुरक्षित नेटवर्क
ग्राहकांसाठी महत्त्वाची सूचना
जर तुम्ही वजन कमी करण्यासाठी ऑनलाइन प्लॅटफॉर्मवरून कोणतेही सप्लिमेंट खरेदी केले असेल, तर त्याचा वापर तात्काळ थांबवा. ज्यांनी या सप्लिमेंट्सचे सेवन केले आहे, त्यांनी कोणतीही लक्षणे दिसत नसली तरीही त्वरित डॉक्टरांचा सल्ला घ्यावा. स्वतःच्या विल्हेवाटीने ही उत्पादने नष्ट करण्याचे आवाहन प्रशासनाकडून करण्यात आले आहे.
