![Devendra Fadnavis : राऊतांच्या ’10 मिनिटांत मुंबई बंद’ करण्या च्या दाव्यावर फडणवीसांनी डागली तोफ; "आता यांच्यात कोणात ‘तो’ दम नाही!"](https://jaimaharashtranews.com/wp-content/uploads/images/1c868572-37f6-4a34-af6d-ebcacc44ff1611012026183104.jpg?w=1200&enlarge=true "Devendra Fadnavis : राऊतांच्या ’10 मिनिटांत मुंबई बंद’ करण्या च्या दाव्यावर फडणवीसांनी डागली तोफ; "आता यांच्यात कोणात ‘तो’ दम नाही!"")
Devendra Fadnavis on Sanjay Raut : मुंबई महानगरपालिका निवडणुकीच्या धामधुमीत सध्या आरोप-प्रत्यारोपांच्या जोरदार फैरी झाडल्या जात आहेत. शिवसेना (ठाकरे) पक्षाचे खासदार संजय राऊत यांनी "आम्ही आजही मुंबई 10 मिनिटांत बंद पाडू शकतो," असे खळबळजनक विधान एका मुलाखतीत केले होते. या विधानामुळे राजकीय वातावरण चांगलेच तापले असून, राज्याचे मुख्यमंत्री देवेंद्र फडणवीस यांनी राऊतांच्या या दाव्याची अक्षरशः पिसे काढली आहेत.
बाळासाहेबांची ताकद आणि आजची स्थिती
एका खासगी वृत्तवाहिनीवरील कार्यक्रमात बोलताना संजय राऊत यांनी केलेल्या विधानाचा मुख्यमंत्री फडणवीस यांनी तीव्र शब्दांत समाचार घेतला. "एकेकाळी बाळासाहेब ठाकरे यांचा शब्द प्रमाण असायचा. त्यांच्या एका इशाऱ्यावर अवघ्या 2 तासांत मुंबई ठप्प होण्याची ताकद शिवसेनेत होती," अशा शब्दांत फडणवीसांनी जुन्या आठवणींना उजाळा दिला. मात्र, लगेचच त्यांनी सध्याच्या नेतृत्वावर टीका करताना म्हटले की, "आता यांच्यात ती ताकद किंवा तो 'दम' उरलेला नाही." "संजय राऊत हे दिवसभर केवळ अशी विधाने करून हवेत बाण मारत असतात," असा टोलाही त्यांनी लगावला.
शिंदेंच्या एन्ट्रीचा दाखला देत राऊतांना टोला
संजय राऊत आणि उद्धव ठाकरे यांच्याकडून दिल्या जाणाऱ्या धमक्यांना आम्ही घाबरत नाही, असा स्पष्ट संदेश फडणवीसांनी दिला. त्यांनी एकनाथ शिंदे यांच्या बंडावेळच्या प्रसंगाची आठवण करून दिली. "जेव्हा शिंदे आणि आमदारांनी गुवाहाटी गाठले होते, तेव्हा त्यांना मुंबईत पाऊल ठेवू देणार नाही, असे मोठे आव्हान ठाकरेंनी दिले होते. पण प्रत्यक्षात काय झाले? शिंदे 50 आमदारांसह मुंबईत आले, राजभवनात गेले आणि आम्ही सरकारही स्थापन केले. मग तेव्हा तुमची ताकद कुठे गेली होती?" असा खोचक सवाल फडणवीसांनी केला.
"घराचा परिसरही बंद करू शकले नाहीत"
देवेंद्र फडणवीस यांनी राऊतांच्या विधानाचा उल्लेख 'पोकळ धमक्या' असा केला. "मुंबई बंद करणे तर सोडाच, पण हे लोक स्वतःच्या घराभोवतीचा साधा परिसरही बंद पाडू शकले नाहीत," अशा शब्दांत त्यांनी राऊतांच्या दाव्याची खिल्ली उडवली. केवळ सत्तेच्या काळात बाता मारणे सोपे असते, पण जमिनीवरची वस्तुस्थिती पूर्णपणे वेगळी असल्याचे फडणवीस यांनी अधोरेखित केले. या टीकेमुळे महापालिका निवडणुकीच्या रणांगणात 'बंद घडवून आणणे' आणि 'बंद घडवण्याची ताकद' या मुद्द्यावरून नवीन वाद सुरू झाला आहे.
संजय राऊतांचे नेमके विधान काय होते?
या वादाची ठिणगी संजय राऊत यांच्या त्या विधानामुळे पडली, ज्यामध्ये त्यांनी म्हटले होते की, "निवडणुकीत हार-जीत होत असते, पण आमचे संघटन आजही तितकेच मजबूत आहे. आम्ही आजही 10 मिनिटांत मुंबई बंद करण्याची क्षमता राखतो, हीच आमची सर्वात मोठी उपलब्धी आहे." राऊतांच्या मते, ठाकरे आणि शिवसेना वाचली तरच मुंबईचा मराठी माणूस टिकेल. मात्र, फडणवीसांनी हा मुद्दा पूर्णपणे खोडून काढत मुंबईच्या प्रगतीसाठी अशा धमक्या देणाऱ्यांची गरज नसल्याचे स्पष्ट केले आहे.
