Ambadas Danve on Rupali Chakankar : राज्य महिला आयोगाच्या माजी अध्यक्षा रुपाली चाकणकर यांच्या राजीनाम्यानंतर महाराष्ट्राचे राजकारण चांगलेच तापले आहे. विधान परिषदेचे विरोधी पक्षनेते अंबादास दानवे यांनी या प्रकरणावर अत्यंत कडक शब्दांत ताशेरे ओढले आहेत. एका भोंदूबाबाच्या ट्रस्टसोबत संबंध ठेवणे आणि महिलांचे शोषण करणाऱ्या व्यक्तीला ‘गुरुस्थानी’ मानणे हे केवळ चूक नसून ‘महापाप’ आहे, असे दानवे यांनी म्हटले आहे. या प्रकरणातील गांभीर्य पाहता, राष्ट्रवादी काँग्रेसने केवळ राजीनामा घेऊन न थांबता चाकणकर यांना तातडीने पक्षातून काढून टाकले पाहिजे, अशी मागणीही त्यांनी केली आहे.
भोंदूबाबाला ‘गुरुस्थानी’ मानणे हा बचावाचा प्रयत्न
अंबादास दानवे यांनी रुपाली चाकणकर यांच्या ‘गुरुस्थानी’ मानण्याच्या स्पष्टीकरणावर जोरदार आक्षेप घेतला. ते म्हणाले की, गुरुला ओळखण्याची क्षमता असणे आवश्यक आहे. एखाद्या व्यक्तीबद्दल 1 ते 1.5 वर्षांपूर्वीच आक्षेपार्ह माहिती समोर आली असतानाही, त्यांना गुरु मानणे आणि त्यांच्या पाया पडणे हे कृत्य संशयास्पद आहे. विशेष म्हणजे, पत्रकारांना धमक्या दिल्या गेल्याचा आरोपही यावेळी करण्यात आला. चाकणकर यांनी राजीनामा देण्यापूर्वी पोलीस महासंचालकांना पत्र लिहून कारवाईची मागणी करणे, हा केवळ स्वतःला वाचवण्याचा एक केविलवाणा प्रयत्न असल्याचेही दानवे यांनी नमूद केले.
एसआयटी चौकशीवर अविश्वास आणि भ्रष्टाचाराचे आरोप
या प्रकरणाच्या चौकशीसाठी नेमण्यात आलेल्या विशेष तपास पथकावर (SIT) अंबादास दानवे यांनी अविश्वास दर्शवला आहे. यापूर्वीच्या अनेक SIT चौकशींचे काय झाले, असा सवाल त्यांनी उपस्थित केला. या प्रकरणाचे धागेदोरे राज्य मंत्रिमंडळातील 8 ते 9 नेत्यांपर्यंत पोहोचले असल्याच्या चर्चेवरही त्यांनी भाष्य केले. घटनेची शपथ घेतलेल्या व्यक्तींनी अशा तांत्रिक-मांत्रिक प्रकारात पडणे हे अत्यंत चुकीचे आहे. तसेच, संबंधित भोंदूबाबाच्या संस्थेला धरणातून राखीव पाणी देण्यावरूनही त्यांनी महायुती असो वा महाविकास आघाडी, दोषींवर कठोर कारवाईची मागणी केली.
राजकीय पाठींबा आणि सभागृहातील रणकंदन
राष्ट्रवादीचे नेते सुनील तटकरे यांनी चाकणकर यांची पाठराखण केल्याच्या आरोपावर दानवे म्हणाले की, प्रदेशाध्यक्ष आपल्या कार्यकर्त्याला वाचवण्याचा प्रयत्न करत असतात, परंतु येथे प्रकरण गंभीर आहे. केवळ फोटो असणे हा गुन्हा नाही, मात्र चाकणकर यांचा सहभाग स्पष्टपणे दिसून येत आहे. या प्रकरणाचे पडसाद आगामी अधिवेशनात उमटणार असल्याचे संकेतही त्यांनी दिले आहेत. येत्या सोमवारी दोन्ही सभागृहात हाच मुख्य विषय असेल आणि विरोधक सरकारला धारेवर धरतील, असा इशारा त्यांनी दिला. या प्रकरणाशी संबंधित संपत्तीच्या चौकशीचीही मागणी आता जोर धरू लागली आहे.
