Uddhav Thackeray: जंतरमंतर येथे ‘कॉक्रोच जनता पार्टी’च्या नेतृत्वाखाली झालेल्या तरुणांच्या तीव्र आंदोलनामुळे अखेर केंद्रीय शिक्षण मंत्री धर्मेंद्र प्रधान यांना आपल्या पदाचा त्याग करावा लागला. या ऐतिहासिक यशाचा आनंद साजरा करण्यासाठी आणि आंदोलक तरुणांचे अभिनंदन करण्यासाठी मुंबईत ठाकरे बंधूंच्या (राज ठाकरे व उद्धव ठाकरे) नेतृत्वाखाली अभूतपूर्व ‘तिरंगा रॅली’ काढण्यात आली. सुरुवातीला समर्थनासाठी आयोजित केलेल्या या मोर्चाचे रुपांतर जनसागराच्या उपस्थितीत एका भव्य विजयोत्सवात झाले. या वेळी उपस्थित जनसमुदायासमोर बोलताना उद्धव ठाकरे यांनी केंद्र सरकारवर अत्यंत कठोर शब्दांत टीका केली.
‘अंधभक्तांविरुद्ध देशभक्तांचा विजय’
मुंबईकरांच्या प्रचंड प्रतिसादाबद्दल देशवासीयांचे आभार मानताना उद्धव ठाकरे म्हणाले की, हा विजय कोणत्याही राजकीय निवडणुकीतील यश नसून अंधभक्तांच्या अहंकाराविरोधात देशातील आम नागरिकांनी व देशभक्तांनी मिळवलेला मोठा विजय आहे. जात, पात आणि धर्माच्या भिंती ओलांडून नागरिक एकत्र आल्याने ही ‘भाजप विरुद्ध भारत’ अशा मोठ्या संघर्षाची दणकेबाज सुरुवात ठरली आहे. एका सामान्य आणि संघटित ताकदीने हुकूमशाही वृत्तीला झुकण्यास भाग पाडले असल्याचे प्रतिपादन त्यांनी केले.
आता सुरु असलेला संघर्ष ‘भाजप विरुद्ध भारत’ असा संघर्ष आहे!
ह्यासंघर्षात तुम्ही जात-पात-धर्म-पक्ष विसरून;
मी भारतीय, देशभक्त आहे ह्या एकाच भावनेने सहभागी झालात! pic.twitter.com/qEVg1NIhVS — ShivSena – शिवसेना Uddhav Balasaheb Thackeray (@ShivSenaUBT_) July 26, 2026
नितीन गडकरी टार्गेटवर; इथेनॉल धोरणावरून नव्या लढ्याचे संकेत
धर्मेंद्र प्रधानांच्या राजीनाम्यानंतर उद्धव ठाकरेंनी आता पुढील संकेत दिले आहेत. केंद्रीय रस्ते वाहतूक मंत्री नितीन गडकरी यांच्या इथेनॉलविषयक धोरणावर बोट ठेवत त्यांनी आगामी काळात हाच विषय पेटवणार असल्याचा स्पष्ट इशारा दिला. देशातील महागाई आणि सुरक्षेसारख्या महत्त्वाच्या मुद्द्यांकडे दुर्लक्ष करून केंद्रीय मंत्री इतर पक्ष फोडण्यात आणि सहकाऱ्यांचा बचाव करण्यात मग्न असल्याचा आरोप त्यांनी केला. ईव्हीएम किंवा मते चोरता येतील, पण जनतेचा रोष आणि मनं चोरता येत नाहीत. तरुणांनी अन्यायाविरुद्ध पेटवलेली ही ठिणगी देशाच्या इतिहासात सुवर्णअक्षरांनी नोंदवली जाईल, असा विश्वासही त्यांनी यावेळी व्यक्त केला.
