Construction Accident in Byculla: मुंबईच्या भायखळा परिसरात शनिवारी दुपारी झालेल्या दुर्घटनेत दोन कामगारांचा दुर्दैवी मृत्यू झाला, तर तीन जण जखमी झाले. हंस रोडवरील हबीब मॅन्शन येथे इमारतीच्या पायाभरणीचे काम सुरू असताना दुपारी 2:41 वाजता अचानक माती आणि चिखल कोसळून कामगार ढिगाऱ्याखाली अडकले. सदर घटनेची माहिती मिळताच आपत्कालीन सेवांनी तातडीने घटनास्थळी धाव घेतली. जखमींना तात्काळ नायर रुग्णालयात नेण्यात आले. मात्र, उपचारापूर्वीच 30 वर्षीय राहुल आणि 28 वर्षीय राजू यांना डॉक्टरांनी मृत घोषित केले.
हेही वाचा – Paithan : गेल्या काही दिवसांपासून पत्नी माहेरी, आई-वडील ही बाहेरगावी! चिंताग्रस्त तरुणाने उचललं टोकाचं पाऊल
जखमी कामगारांमध्ये सज्जाद अली (25), सोबत अली (28) आणि लाल मोहम्मद (18) यांचा समावेश आहे. नायर रुग्णालयातील सहाय्यक वैद्यकीय अधिकारी डॉ. पूनम यांनी सांगितले की तिघांचीही प्रकृती स्थिर असून उपचार सुरू आहेत. मुंबईत बांधकामाशी संबंधित दुर्घटनांची वाढ चिंताजनक बनत आहे. केवळ काही दिवसांपूर्वी, 29 ऑक्टोबर रोजी माहीममध्ये पाडकामादरम्यान चार मजली इमारत कोसळली होती. या घटनेत दोन कामगार जखमी झाले होते.
माहीम रेल्वे स्थानकाजवळील जॉन्सन अँड जॉन्सन इमारतीत काम सुरू असताना पहिला आणि दुसरा मजला कोसळून जेसीबी व जवळच्या चारचाकीवर पडला. या अपघातात शाहरुख खान (24) आणि मोहम्मद अयुब (24) हे जखमी झाले होते. दोघांनाही तातडीने रुग्णालयात हलवण्यात आले. त्यांची प्रकृती स्थिर असल्याचे डॉक्टरांनी सांगितले. बांधकामादरम्यान सतत होत असलेल्या अशा दुर्घटनांमुळे मजूरांच्या सुरक्षा उपाययोजनांबाबत गंभीर प्रश्न उपस्थित होत आहेत.
