Dattatray Bharne: महाराष्ट्र सरकारने महिला शेतकऱ्यांच्या सक्षमीकरणासाठी एक अत्यंत महत्त्वाचे आणि ऐतिहासिक पाऊल उचलले आहे. कृषिमंत्री दत्तात्रय भरणे यांनी दिलेल्या माहितीनुसार, महिला शेतकऱ्यांच्या हक्कांचे रक्षण करणारे विशेष विधेयक विधानसभेत आधीच मंजूर झाले असून, आता ते येत्या सोमवारी विधान परिषदेत मंजुरीसाठी मांडले जाणार आहे. ग्रामीण भागातील ज्या महिला शेती, कुक्कुटपालन किंवा दुग्धव्यवसायात रात्रंदिवस घाम गाळतात, मात्र सात-बारा उताऱ्यावर त्यांचे नाव नसते, अशा सर्व कष्टकरी महिलांना आता सरकारकडून एक विशेष ओळख प्रमाणपत्र दिले जाणार आहे. या प्रमाणपत्रामुळे महिलांना केंद्र आणि राज्य सरकारच्या विविध कल्याणकारी योजनांचा थेट लाभ घेणे सुलभ होणार आहे.
सात-बारावर नाव नसले तरी मिळणार प्रमाणपत्र; योजनांचा मार्ग मोकळा
कृषिमंत्र्यांनी स्पष्ट केले की, या प्रमाणीकरण प्रक्रियेत केवळ जमिनीची मालकी असलेल्या महिलांचाच नव्हे, तर शेतमजूर म्हणून काम करणाऱ्या किंवा कुक्कुटपालन व दुग्धव्यवसाय क्षेत्रात सक्रिय असलेल्या महिलांचाही प्रामुख्याने समावेश केला जाईल. सध्या या योजनेअंतर्गत लाभ मिळणाऱ्या महिलांची अंतिम आकडेवारी निश्चित नसली, तरी ज्या भगिनींच्या नावावर सध्या कोणतीही जमिनीची मालकी नाही, त्यांना मुख्य प्रवाहात आणणे हाच या योजनेचा मुख्य उद्देश आहे. यामुळे ग्रामीण भागातील महिलांना हक्काची स्वतंत्र ओळख मिळणार आहे.
राज्यातील पावसाच्या सद्यस्थितीवर बोलताना कृषिमंत्र्यांनी सांगितले की, सध्या मुंबई, ठाणे, रत्नागिरी आणि संपूर्ण कोकण पट्ट्यात मुसळधार पाऊस सुरू आहे. विदर्भातही पावसाने चांगला जोर धरला आहे. आकडेवारीनुसार, राज्यात आतापर्यंत एकूण खरिपाच्या क्षेत्रापैकी साधारणतः 25 टक्के पेरण्या पूर्ण झाल्या आहेत. मात्र, नाशिक आणि पुणे विभागात अजूनही सरासरीच्या तुलनेत 50 टक्के पेक्षा कमी पाऊस झाल्याने काहीशी चिंता आहे. अमरावती विभागात मात्र पावसाची स्थिती उत्तम आहे. हवामान विभागाच्या अंदाजानुसार, येत्या 3 ते 4 दिवसांत संपूर्ण महाराष्ट्रात सर्वदूर चांगला पाऊस पडेल, ज्यामुळे खोळंबलेल्या पेरण्यांना मोठा वेग येईल.
शेतकऱ्यांनी काळजी करू नये; खतांची दरवाढ टळली, साठा पुरेसा
शेतकऱ्यांसाठी आणखी एक दिलासादायक बातमी देताना दत्तात्रय भरणे यांनी खतांच्या किमतींबाबत महत्त्वपूर्ण खुलासा केला. आंतरराष्ट्रीय पातळीवरील युद्धाचे सावट आणि त्याचे परिणाम आता संपले असल्याने, खतांच्या किमतींमध्ये कोणतीही वाढ होणार नाही, अशी ग्वाही त्यांनी दिली. महाराष्ट्रात सध्या खतांचा अत्यंत योग्य आणि पुरेसा साठा उपलब्ध आहे. त्यामुळे कोणत्याही शेतकऱ्याने खतांच्या तुटवड्याबाबत किंवा दरवाढीबाबत मनात कोणतीही शंका अथवा काळजी बाळगू नये, असे आवाहन कृषिमंत्र्यांनी केले आहे.
