EPFO 3.0: भविष्य निर्वाह निधी (PF) खातेधारकांसाठी एक अत्यंत आनंदाची आणि क्रांतिकारक बातमी समोर आली आहे. आता आणीबाणीच्या काळात किंवा पैशांची गरज भासल्यास तुम्हाला कोणत्याही बँकेच्या ATM वर जाऊन थेट तुमच्या PF खात्यातून पैसे काढता येणार आहेत. 'EPFO 3.0' या नवीन उपक्रमांतर्गत कर्मचारी भविष्य निर्वाह निधी संघटना (EPFO) आपल्या डिजिटल प्रणालीत मोठे बदल करत आहे. या सुविधेमुळे पीएफमधून पैसे काढण्याची प्रक्रिया एखाद्या सामान्य बचत खात्यातून पैसे काढण्याइतकीच सोपी आणि वेगवान होणार आहे.
मे 2026 पर्यंत सुविधा सुरू होण्याची शक्यता; 'EPFO 3.0' चा मोठा पाऊल
सूत्रांनी दिलेल्या माहितीनुसार, ही नवीन ATM आणि UPI आधारित सुविधा मे 2026 च्या अखेरीस प्रत्यक्ष अंमलात येण्याची दाट शक्यता आहे. EPFO आपल्या सदस्यांना विशेष ATM कार्ड जारी करणार असून ते थेट त्यांच्या PF खात्याशी जोडलेले असेल. यासोबतच UPI मुळे मोबाईलवरूनही व्यवहार करणे शक्य होईल. या नवीन नियमांनुसार, खातेदार त्यांच्या एकूण शिल्लक रकमेपैकी 50 टक्क्यांपर्यंतची रक्कम तातडीने काढू शकतील. यामुळे कठीण प्रसंगी कागदपत्रांच्या कटकटीशिवाय निधी मिळवणे सुलभ होईल.
कोणाला मिळणार लाभ? KYC आणि 'आधार' लिंक असणे अनिवार्य
या अत्याधुनिक सुविधेचा लाभ घेण्यासाठी काही तांत्रिक अटींची पूर्तता करणे आवश्यक आहे. खातेदाराचा UAN (युनिव्हर्सल अकाउंट नंबर) सक्रिय असणे गरजेचे आहे. तसेच, तुमचे KYC पूर्ण असणे अनिवार्य आहे, ज्यामध्ये बँक खाते, IFSC कोड आणि पॅन कार्डचा समावेश आहे. याशिवाय, तुमचे आधार कार्ड देखील UAN शी जोडलेले असणे बंधनकारक आहे. या अटी पूर्ण असलेल्या सदस्यांनाच ही 'स्मार्ट' सुविधा वापरता येईल.
दाव्यांच्या निवारणात विक्रमी कामगिरी; 71 टक्के दावे 'ऑटो मोड'वर
केंद्रीय कामगार आणि रोजगार मंत्री मनसुख मांडविया यांनी दिलेल्या माहितीनुसार, EPFO ने 2025-26 या आर्थिक वर्षात 8.31 कोटी दाव्यांचा यशस्वी निपटारा केला आहे. विशेष म्हणजे, यातील 71 टक्के दावे 'ऑटो मोड'च्या माध्यमातून अवघ्या तीन दिवसांत निकाली काढण्यात आले आहेत. 'EPFO 3.0' मुळे आता दाव्यांचा स्वयंचलित निपटारा, नोकरी बदलताना निधीचे अखंडित हस्तांतरण आणि चेकबुकशिवाय दावे सादर करण्याची सुविधा मिळणार आहे. यामुळे भ्रष्टाचार आणि विलंब रोखण्यास मोठी मदत होणार आहे.
